Ndzawulo yi angula swihehlo swa xibedlele

Themba Chauke

Ndzawulo ya Rihanyo ya Xifundzhankulu xa Limpopo, yi vula leswaku yi tekela enhlokweni xikan’we na ku vilerisiwa hi nkandziyiso wa vhidiyo lowu hangalakaka na swihangalasa mahungu swa mani na mani laha ku hehliwaka ku honisiwa ka wansati na n’wana wakwe wo vabya ku ringana tiawara ta Nkombo va nga pfuniwi ku pfula fayili exibedlele xa Matlala. Ndzawulo yi vula leswaku yi tekela enhlokweni swihehlo leswi, hikuva vavabyi a va fanelanga ku yima nkarhi wo leha hi ndlela leyi va nga se pfuniwa, ngopfu-ngopfu eka tindhawu ta vutshunguri ta mfumo.

Muvulavuleri wa Ndzawulo Neil Shikwambana u kombisile leswaku loko va ta va vahlanganile ni nkadziyiso lowu eka siku ra namuntlha ti 05 Mudyaxihi 2025, va sungurile vulavisisi ku kuma ntiyiso hi mhaka leyi. “Leswi swi katsa ku kuma siku na nkarhi lowu swi endlekeke ha wona ku kota ku kuma vanhu lava khumbhekaka. Enkarhini wa sweswi, muvabyi loyi a khumbekaka na yena u le ku laviweni leswaku ku ta tiyisiswa nkarhi lowu a fikeke ha wona na mafambelo ma yena endzeni ka xibedlele xikan’we na loko a pfuniwile,

“Ku ya emahlweni, Ndzawulo yi le ku lavisiseni ka swihehlo swa leswaku van’wana vatirhi a va nga ri kona tanihileswi swi kombiweke eka nkandziyiso. “Loko swo kumeka leswaku van’wana a va nga ri kona entirhweni, ku ta tekiwa magoza lama ma faneleke ku ya hi milawu ya ndzawulo,” Ku vula Shikwambana.

Loko Ndzawulo yi angula hikokwalaho ka thyaka leri kombisiweke eka nkandziyiso, Ndzawulo ya amukela leswaku Ndhawu leyi yi amukelaka vavabyi va le handle, yi na migingiriko swinene laha a vuleke leswaku tindhawu ta muxaka lowu ti fanele ku tshamela ro basisiwa mikarhi hinkwayo. “Hambiswiritano, a hi na vuxokoxoko by andhawu leyi ku vulavuriwaka hi yona eka nkadziyiso, naswona hi le ku lavisiseni ka nkandziyiso leswaku ndhawu leyi yi boxiweke ku nga va ku ri kwihi,” u ya emahlweni.

“Ndzawulo yi navela ku tiyisisa eka vaaki leswaku yi tinyiketerile ku tiyisisa leswaku vavabyi hinkwavo va kuma vukhorokeri bya vutshunguri bya xindzhuti, nhlonipho naswona byaxihatla,” wa gimeta laha a kombeleke vaaki ku ya emahlweni va mangala maendlelo ya muxaka lowu hi ku tirhisa vufambisi bya tindhawu ta vutshunguri lebyi byi faneleke kumbe tindlela ta ku rhumela swivilelo eka Ndzawulo leswaku ku ta tekiwa magoza hi nkarhi eka timhaka leti.