Tinhlayo ta vugevenga ti Tlakuka
Hi MKATEKO NDLOVU
Vaaka-tiko va ka Malamulele exifundzhenikulu xa Limpopo ehansi ka masipala wa Collins Chabane va dyile makala yo hisa eka siku ra namuntlha, laha va nga pfala magondzo va kombisa leswaku migingiriko hinkwayo yi yifanele yi yima, leswi swi ta endzhaku ku mhangu leyi nga humelela endyangwini wa ka Khosa hi ti 05/06/2025 02;30 na vusiku.
Swiviko swi vula leswaku Swingevenga leswi swi tshovile kutani swi nghena endlwini, laha swi xaniseke n’wana wa nhwananyana hi swa masangu naswona swi tlhandleke hi ku ba n’wana wa jaha wa malembe ya 20, loyi a vitaniwaka Xilaveko Khosa.
Mumangari Mandla Romeo Khosa u hlamule leswaku a etlele ekamareni ra yena loko a twa rivati ri pfuriwa hi ndlela yo chavisa. Loko a pfuka, u vone vavanuna va mbirhi lava a va ti pfarile swikandza. U ri va n’wi kombetele hi xibalesa va lava mali ni riqingho. Mandla u va nyikile riqingho ra yena ra Samsung, a va byela leswaku a nga na mali. Hambiswiritano, tinsulavoya leti ti n’wi bohile ti tsutsumela ekamareni laha ku a ku ri vana, ti fika ti balesa Xilaveko Khosa (wajaha) naswona ti xanisa xinhwenyana wa malembe ya 17 hi swa masangu.
Mumangari u vula leswaku u kotile ku ti ntshunxa endzhaku ko bohiwa, kutani a tsutsumela ekamareni ra vana. Loko a fika, u kume Xilaveko a ri ehansi, a baleseriwile naswona a tele hi tingati laha a a etlele kona. N’wana wa nhwanyana na yena a xanisiwile hi swa masangu. “komberile ku pfuniwa eka vaakelani, lava va nga fonela maphorisa na va xilamulela mhangu.”
Loko va ri karhi va kongoma exibedlela ku ya lava ku pfuniwa, va kume leswaku Xilaveko Khosa u hundzile emisaveni. Mumangari u kombisa leswaku tinsulavoya leti tikekile ti tirhise swilo swo tanihi riqingho, basikiri, mavokule, laptop, Bosch chainsaw na girendara.
Vaaki va vule leswaku Malamulele a ka ha ri ndhawu leyi nga hlayiseka, hinkwalaho ka ku andza ka vugevenga, naswona va kombela leswaku maphorisa ma nghenelela hi xihatla. Ku nga se humelela mhangu leyi, vaaki va kombisile leswaku hi siku ra 07/05/2025 va ta heleketa memorandamu ya swivelelo, hikwalaho ka ku tlakuka ka vugevenga erivaleni ra le Malamulele.
