Ma-Afrikaner ma Fambile Laha Tikweni

Hi Themba Chauke

Ntlawa wo sungula wa Ma-Afrikaner lava va amukeleke ndhawu ya vutumbelo kusuka eka puresidende wa Amerika, Donald Trump va fambile laha tikweni. Swiviko swi kombisa leswaku kwalomu ka 49 wa vona a va ri erivaleni ra
swihahampfhuka ra OR Tambo eka siku ra ti 11 Mudyaxihi 2025 ku ya kandziya xihahampfhuka xo hlawuleka ku va yisa etikweni ra Amerika ku ya kuma vutumbelo.

Muvulavuleri wa Ndzawulo ya Vutleketli laha tikweni Collen Msibi, u vurile leswaku ntlawa lowu, hi wona ntsena lowu wu endleke swikombelo swo rhurha laha tikweni ra Afrika-Dzonga ku ya eAmerika hi ku tirhisa Ndzawulo. U vurile leswaku Ndzawulo yi kumile swikombelo hi siku ra ti 05 Mudyaxihi kutani yi swi amukela na ku swi pasisa.

U tlherile a kombisa leswaku xikombelo a xi fanele ku kombisa ndlela ya xihahampfhuka na nhlayo ya vanhu. Kasi a nga kombisanga loko vanhu lava va kamberiwile swiyimo swa vugevenga.

Donald Trump u nyikile Ma-Afrikaner ya laha tikweni vutumbelo bya le Amerika loko a sayina nawu wa le tikweni leriya. AfriForum yi arile xikombelo lexi yi vula leswaku Ma-Afrikaner ma lava ku tshama laha tikweni ma aka Afrika-Dzonga Kasi Donald Trump u vula leswaku ku na swilo swo chavisa swinene leswi swi humelelaka ehenhla ka Ma-Afrikaner laha tikweni.

Ndhasundhasu leyi yi sungurile endzhaku ka loko Puresidende wa tiko Cyril Ramaphosa, a sayinile nawu wo teka misava hi swiyenge swa mfumo leswaku vaaki va ta vuyeriwa. Kasi van’wana va vula leswaku Mfumo wa Afrika-Dzonga wu xupuriwa hikokwalaho ka ku pfula nandzu wa vugevenga ehenhla ka tiko ra Israel ekhoto ya misava ya ICC eka timhaka ta tiko ra Israel na Palestine.