Muntshwa la Dlaweke a Vekiwa
Hi Mkateko Ndlovu
Ntirho wo heleketa Laveko khosa wa 20 wa malembe hi vukhale a wu khomeriwile eholweni ya vaaki edorobeni ra ka Malamulele, hi siku ra 10 Mudyaxihi 2025. Vaaki, Masipala wa Collins Chabane, Masipala wa xifundzhantsongo xa Vhembe, nhlangano wa vafundhisi, vana va xikolo xa le henhla xa EPP Mhinga, eka van’wana, a va humile hi xitalo ku ya khoma xikatla vandyangu wa Khosa.
Leswi swi ta endzhaku ka loko ndyangu wa ka Khosa wu weriwile hi papa ra ntima, laha n’wana wa vona wa jaha a nga hundza emisaveni hi ndlela ya tihanyi, hikuva a baleseriwile a lova hi swigevenga swo fa tshiriti. Mhangu leyi yi siyile timbilu ta vaaki ti tshovekile no tsana swinene hikuva mhangu ya muxaka lowu ya chavisa swinene. Swi vulavuri swo tala swi vulavurile hi ndlela leyi Laveko Khosa a ri xiswona ku katsa na nhloko ya xikolo xa le Henhla xa EPP Mhinga, Tatana Sono, laha a nga hlamusela hi vumunhu bya Laveko Khosa.
“Laveko Khosa a ri n’wana loyi a tinyiketerile swinene eka mitirho ya yena ya xikolo, loko hi languta mbuyelo wa yena kusukela eka kotara yo sungula a pasa kahle naswona a pasa hi tinyeleti. A ndzi ri na ku tshembha leswaku Laveko Khosa u ta va un’wana wa vana lava va nga ta humesa mbuyelo wa kahle, leswi swi vulaka leswaku sweswi hi lahlekeriwile hi nyeleti yin’we exikolweni xa hina’’ Nhloko ya xikolo xa EPP wa hlamusela.
Meyara wa masipala wa Collins Chabane Mukhaselara Shadrack Maluleke, u vurile leswaku masipala wa Collins Chabane wu weriwile hi gome lerikulu, hikokwalaho ka tihlayo ta vugevenga leti ti ya ka emahlweni ti tlakuka siku na siku. Meyara u vurile leswaku u vile ni nkateko wa ku burisana na mukhomixinara wa xifundzhankulu Jenerali Hadebe na MEC manana Violet Mathye mufambisi wa ndzawulo ya xiphorisa, laha a nga hlamusela swiphiqho hinkwaswo swa vugevenga leswi vaaki va ka Malamulele va hlanganaka na swona.
’’Va ndzawulo ya xiphorisa va kombisile leswaku va amukela leswaku vugevenga byi tinyikile matimba etindhawini ta ka Malamulele, kambe va kombisile leswaku va lulamerile ku ringana ku lwisana na vugevenga bya muxaka lowu,’’ Meyara wa hlamusela. Meyara u kombisile leswaku loko vaaki va miganga ya ka Malamulele vo khomana va lwisana na vugevenga va nga hlula.
“Eka vantshwa, ndzi mi hlohlotela leswaku mi dyondza xikolo hikuva xikolo hi xona xi nga ta endla leswaku hi papalata vugevenga emigangeni ya hina,’’ Ku vula Meyara wa masipala wa xifundzantsongo xa Vhembe mukhaselara Freda Nkondo, laha a nga tshembhisa vaaki leswaku mfumo wu ta lwela vulalami eka vandyangu wa ka Khosa.
U yi le emahlweni a kombisa leswaku u navela leswaku tinsulavoya leti ti fanele ku ya bolela ekhotsweni a tlhela a kombela leswaku maphorisa ya ka Malamulele ya susiwa eka xitichi xa maphorisa xa laha kaya va ya tirhela ekule hikuva ku tirhela laha kaya swi tikomba swi va tsandza.
