Ku Bananiwa hi Rhanga ro Hisa Hinkokwalaho ka Nhlawulo

Hi Themba Chauke

Meyara wa masipala wa Lepelle Nkumpi, Mariam Molala u hoxeteriwile hi maribye eka movha lowu a famba hi wona hi nkarhi wa pfhumba ra IDP eLebowakgomo hi vaaki lava a va hlundzukile hikokwalaho ka ku tsana ka vukorhokeri bya mani na mani eLebowakgomo, Zone F na Zone A. Vaaki va tlhela va hehla Molala hikuva a tirhisa xin’wana manana eka masipala xikan’we na ku nyika switandi ntsena eka vanhu lava a va tsakelaka etindhawini letiya.

Leyi hi yin’wana ya timhangu leti ti humeleleke eka xifundzhankulu xa Limpopo, tainihileswi xifundzhantsongo xa Peter Mokaba, xi langutaneke ni nhlawulo wo hlawula vurhangeri bya vandla ra ANC eka xifundzhantsongo lexi. Ku vuriwa leswaku etindhawini ta Polokwane, munghana wa Molala, meyara wa masipala wa Polokwane, John Mpe, loyi na yena a hlanganile na xiyimo lexi xi fanaka, u byerile ntshungu lowu na wona a wu ri eka nhlengeletano ya IDP, leswaku wu huma wu famba loko wu nga lavi ku n’wi yingisela.

Kasi eLebowakgomo, varindzi va bohekile ku ta kutsula Meyara eka ntshungu wa vaaki lava a va dyile makala yo hisa. Murhangeri wa vaaki, William Mphahlele u vurile leswaku i khale va ri ku tiyiseleni ka vukorhokeri byo tsana kusukela loko Meyara a tekile matomu malembe mantlhanu lama hundzeke.

“Langutani endhawini ya mavhengele ya le Zone F, ndhawu liya a yi le ku tekeriweni enhlokweni. Swi na nkarhi hi tshamile na malakatsa lawa ya nga tekiwiki. Loko hi ringeta ku burisana na Meyara hi swiphiqo swa hina, u hi tekela hansi,” ku vula Mphahlele.

Hambileswi varindzi va baleseleke xibalesa eka vaaki, kuhava mafu lama vikiweke. Kasi ku vuriwa leswaku meyara Molala u pfurile nandzu eka ntlawa wa vavanuna lava van’wana va vona va nga ri ki swirho swa vaaki lava va khumbhekaka.

Kasi enkarhini lowu wu hundzeke ku vikiwile maendlelo yo ka ya nga tshamisekanga eka ku nyika tithendara eka masipala lowu laha ku hehliwaka leswaku munghana wa Molala, Mpe, hi yena a lerisaka Molala leswaku a nyika mani tithendara.