Swaboha a Gweviwa 20 wa Malembe
Hi Themba Chauke
Khoto ya Xifundzha ya Thabazimbi, yi gwevile wanuna wa malembe ya 29, ku tshama ekhotsweni malembe ya 20 hi swihehlo swo pfinya xinhwanyetana xa 13 wa malembe hi n’hweti ya Hlangula 2023, leswi ku vuriwaka leswaku i vululami lebyi byi fikeleriweke.
Mupfinyi loyi a gweviweke, vito rakwe a ri nge paluxiwi ku sirhelela mutwisiwakuvava. Ku vuriwa leswaku u voniwile nandzu endzhaku ka swihehlo swo pfinya xinhwanyetana lexi hi siku ra ti 09 Hlangula 2023, eNortham ext 02.
Ku ya hi vumbhoni bya le khoto, mutwisiwakuvava a endzerile sesi wakwe loko a ta humeleriwa hi khombo leri. Sesi wa xinhwanyetana lexi u humile nkarhinyana ku ya endla swin’wana na munghana wa yena lokoxinhwanyetana lexi xi sala na muhlekisani wa sesi. Hi wona nkarhi lowu muehleketeleriwa a pfinyeke xinhwanyetana lexi.
Loko sesi wa mutwisiwakuvava a vuya, n’wana loyi a chavisiweke hi mhaka leyi, u byerile sesi wakwe. Xikan’we-kan’we, n’wana loyi u yisiwile ku ya kamberiwa xikan’we na ku pfula nandzu exitichini xa maphorisa ya le Northam. Muehleketeleriwa u khomiwile hi siku ra 10 Hlangula, kutani a nyikiwa beyili endzhaku ka nkarhi.
Ehenhla ka 20 wa malembe lawa a marhekiweke wona, khoto yi lerisile leswaku vito ra swaboha loyi ri tsarisiwa eka tsalwa ra vaxanisi hi timhaka ta masangu etikweni. U tlherile a aleriwa ku khoma xibamu ku ya hi nawu wa tiko wo lawula timhaka ta swibamu.
Khomixinara wa Maphorisa ya xifundzhankulu Leutanant-Jenerali Thembi Hadebe u vurile leswaku ku tiyimisela ka xiyenge xa maphorisa xo lwisana na madzolonga ya le mindyangwini, vusirheleri bya vana na milandzu ya timhaka ta masangu hi ku tirhisana na vuchuchisi, vululami byi endliwile eka xinhwanyetana lexi.
