PURASI RI ENDLA NTSHOVELO

Hi Pilot Manganyi

Purasi leri fambisiwaka hi khamphani ya Baobab fruits leri ri kumekaka emugangeni wa ka Makuleke, ehansi ka Masipala wa Collins Chabane ri endlile ntshovelo wa rona wa mihandzu ya makavatla. Purasi leri a ri byala mihandzu ya tibanana sweswi ri ndlandlamuxile vurimi bya rona laha ri byalaka na makavatla. Ndlandlamuko wa purasi leri swi endla leswaku ku tumbuluka mitirho na ikhonomi ya miganga leyi yi akelaneke tanihi Makuleke, Maviligwe na le ka Mahlohlwani.

Purasi leri ri kota ku tshovela mihandzu ya rona leyi rhwaliwaka hi tilori kutani yi xaviseriwa mavhengele ya swiyimo swa le henhla. Leswi swi endla leswaku purasi leri ri va na xiave lexikulu eka ikhonomi ya tiko kungari ya miganga ya le kusuhi ntsena. A hi mitirho ntsena leyi purasi leri ri pfunaka vaaki ha yona.  Van’wamabindzu lava xavisaka exidorobanini xa Saselamani va kota ku xava tibanana na makavatla hi ntsengo wa le hansi. Vaaki va fumberiwa mihandzu ya tibanana na makavatla loko ntshovelo wu ri ka rhi wu ya emahlwenu, leswaku na vona va kota kutwa ntswamba wa mihandzu ya misava ya vona.

Vukona bya purasi ra Baobab Fruits byi tlanga xiphemu lexikulu eka vutomi na ndlandlamuko wa miganga ya le kusuhi. Vaaki va miganga va kota ku cinca swiyimo swa le makaya ya vona hi ku aka tindlu. Vatswari va kota ku veka swakudya etafuleni, xikan’we na ku yisa vana va vona eswikolweni. Vatirhi va kota ku fikelela leswi a va nga swi fikeleli mikarhi leyi yi nga hundza. Leswi swi tisa ntsako eka vaaki va miganga ya le kusuhi.

“Hikokwalaho ka ntirho lowu ndzi wu kumeke eka purasi ra Baobab Fruits, ndzi kotile ku tisungulela xindyangwana xamina. Ndzi munhu hikokwalaho ka Baobab Fruits”, ku boxa Morgan Mashimbyi tanihi mutirhi wa purasi ra Baobab Fruits.

Ku byariwa ka mihandzu ya makavatla swi tumbuluxile mitirho yo hlaya, leswi swi nga tlhela swi engetela vatirhi hi vuswikoti bya vurimi. Miganga ya ka Makuleke, Maviligwe na Mahlohlwani, hi yin’wana ya miganga leyi a yi hlupheka hi ku pfumaleka ka mitirho, vukona bya purasi leri byi endlile leswaku ku pfumaleka ka mitirho ku lawuleka.