GONDZO RA JAMES MALULEKE

Hi Pilot Manganyi

James Maluleke, mutlangi wa ndhuma loyi a tlangelaka xipano xa bolo ya milenge xa Mafuyatha, u sungurile gondzo ra yena ra ku tlanga bolo a ri na malembe ya 12 emugangeni wa Maviligwe na vanakulorhi va yena. Maluleke a ku ri mutlangi wa bolo loyi a nga ri na vuswikoti bya ku yi tlanga, u yile emahlweni a kondelela a tlanga bolo hikuva a yi rhandza. Maluleke a ku nga ri mutlangi loyi vatlangikulorhi va yena a va languterile nchumu eka yena hi mikarhi ya mitlangu.

Ku tiyisela na ku tiyimisela ka yena swi vile na mbuyelo lowunene, u vile mutlangi wa vuswikoti laha a nga sungula ku tlangela xipano xa Juventus kusuka emugangeni wa Maviligwe. Maluleke u tlangerile Juventus ku ringana malembe ya khume.

Maluleke u vile mutlangi wa ndhuma laha a nga va a tiveka swinene hikokwalaho ka matlangelo ya yena ya xiyimo xa le henhla laha anga thyiwa vito ra “Motsamai”. Maluleke u thyiwile vito leri hikokwalaho ka rivilo na matlangelo ya yena.

A tsona vasiveli va swipano leswin’wana vurhongo loko a hlanganile na vona. Motsamai i vito leri a nga kula na rona, naswona i vito leri a tinyungubyisaka hi rona kuva a vitaniwa hi rona hikokwalaho ka leswi a nga ri kumisa xiswona.

Maluleke u vile a tlangela xipano xa Mabcity United endzhaku ka loko xipano xa Juventus xi nga ha tlhaveriwanga hi sana endzhaku ka malembe lamo tala. Maluleke u tlangile xiphemu lexikulu eku tumbulukeni ka xipano Mabcity United. Xipano xa Mabcity United a xi tlanga miphikizano ya swidlodlo leswi a swi katsa masagwadi ya mali, timendlele na xidlodlo.

Maluleke u na timendlele to hlaya hikokwalaho ka swidlodlo swo tala leswi va swi hluleke. Leswi swi endlile leswaku xipano xa Mabcity United kuva xipano lexi hloniphekaka no chaviwa hi swipano swin’wana. Ku fikile nkarhi laha swipano swin’wana a swi nga ha lavi leswaku xipano xa Mabcity xi nghenelela miphikizano ya vona hikokwalaho ka nghozi ya matlangelo ya vona.

Xipano xa Mabcity United a xi dzaberiwa hi Mnisi Humphrey loyi a xi ngheneleleke endzhaku ka loko xi tumbulukile. Maluleke u vile xiphemu xa xipano eku tikeni, ni le ku lulameni, xipano xi vile xi nghenelela mphikizano wa ligi ya Collins Chabane LFA tinguva timbirhi leti hundzeke.

Maluleke u tlangile xiphemu xikulu hi nkarhi wa mphikizano wa ligi ya LFA Collins Chabane, laha a nga pfuneta xipano hi ku howisa swikoro, xikan’we na ku pfuneta vatlangikulorhi ku howisa. Mabcity United yi tlangile hi matimba naku tinyiketela laha va nga hetelela eka xiyimo xa vunharhu, laha ligi yi nga tekiwa hi Mafuyatha FC hi nguva ya 2023.

Leswi swi endlile leswaku xipano xa Mabcity United xi nga tlakusiwi kuya tlangela ligi ya xiyimo xa le henhla ya SAFA Vhembe.

Xipano xa Mabcity United xi tlherile xi nghenelela mphikizano wa ligi ya LFA laha va nga tlanga hi vululami na vuswikoti. Mabcity United yi kotile ku hetelela eka rhengu ro sungula, leswi swi endleke leswaku kuva vona vahluri va ligi, kutani va tlakuseriwa kuya eka SAFA Vhembe. Maluleke u vile a hambana na xipano xa Mabcity United emaheteleleni ka nguva ya 2024, endzhaku ka loko a pfunile Mabcity ku hlula eka ligi ya LFA.

Maluleke u vile a nghenelela xipano xa Mafuyatha lexi xi tlangaka eka ligi yale hansi ya LFA Collins Chabane endzhaku ka loko va tlakusiwile va tlhela va xavisa xiyimo xa vona. Maluleke u kombisa leswaku ku hambana ka yena na xipano xa Mabcity United a ku nga ri ku rhandza ka yena.

“Ku hambana na xipano xa le vuhlangini bya mina a ku nga ri ku rhandza ka mina, kambe hikokwalaho ka swirhalanganyi swo karhi ndzi bohekile ku teka xiboho leswaku ndzi nghenelela xipano xa Mafuyatha. Ndzi tsakile nakona hikuva ndza ha tlanga bolo” ku boxa Maluleke. Maluleke u kombisile ku tsana hikokwalaho ka swirhalanganyi leswi swi endleke leswaku a kumeka a nga ha tlangeli xipano lexi a kuleleke eka xona. Hambiswiritano, Maluleke u tiyimiserile ku tlangela xipano xa Mafuyatha, tanihileswi a khomekeke kahle.