MUTLANGI LONTSHWA A TEKERIWA ENHLOKWENI

Hi Themba Chauke

Vukona Mhelembe wa melembe ya 19, wo huma elokixini ra Giyani a ti-F, i mutlangi wa netball loyi a vitaniweke ku ya tlanga eka xipano xa Spar National Championship. U vula leswaku ku vitaniwa kakwe swi pfuxetile ku titshembha na ku tiyisisa ntshembho wa leswaku siku rin’wana a nga ha vitaniwa ku ya tlangela xipano xa rixaka.

Loko a vulavula endzhaku ka ku kuma mahungu, Mhelembe u vurile leswaku a taleriwile hi ntsako. “A ndzi tsakile swinene, leswi nga fika ro sungula emiehleketweni ya mina hi leswaku vuswikoti bya mina byi ta humela eriveleni, naswona ndzi nga ha kuma nkateko wo vitaniwa ku ya tlanga eka xipano xa rixaka,” wa hlamusela.

Mhelembe, loyi ku nga khale a ri na milorho yo tlanga netball eka xiyimo xa le henhla, u vula leswaku u twa a tsakile ku kuma nkateko lowu. “Ndzi khensa Xikwembu xa le henhla ku kuma nkateko lowu naswona ndza khongela leswaku ndzi ta kota ku tirha ntirho lowu ndzi vitaneriweke wona. A ndzi lavi ku khomisa vanhu tingana kumbe va twa va endlile xihoxo ku va va ndzi hlawurile.”

N’wamatsambu loyi u tshembha leswaku leswi i rendzo ro cinca vutomi. “Leswi swi vula swo tala eka mina hikuva swi ndzi nyika nkateko wa ku humesela vuswikoti bya mina ehandle leswaku un’wana na un’wana a swi vona,” ku vula yena.

Ehandle ku ku kula ka ku titshembha ka yena, Mhelembe wa pfumela leswaku a tshamela ku tikeriwa hi ku tikanakana, a ehleketa leswaku a nga ringanelanga ku vitaniwa ku ya tlangela xipano xa le henhla. “Ntlhotlho wukulu a ku ri ku pfumala ntshembho eka mina,” wa hlamusela.

“A ndzi nga swi ehleketi leswaku ndzi nga va mutlangi loyi a ta hlawuriwa ku ya tlanga eka xipano xa Spar National Championship. Sweswi ndzi nga nyikiwa nkarhi, ndza swi tiva leswaku hi ku tirha hi matimba swilo hinkwaswo swa koteka.”

U vurile leswaku nhlohlotelo wakwe wu huma endzeni ka ku navela ku humelela na ku aka vumundzuku hi ku tirhisa ntlango lowu a wu rhandzaka. “Ku navela leswaku ndzi va xanchumu evuton’wini swi ndzi hlohloterile leswaku ndzi endla vutilolori hi matimba leswaku ndzi fikelela swilaveko swa mina, hikuva netball yi lava munhu a tinyiketela swinene eka un’wana na un’wana loyi a lavaka ku humelela.”

Mhelembe u tlherile a nyika switsundzuxo eka van’wamatsambu lavanthswa lava navelaka ku fikelela eka swipano swa rixaka, laha a va hlohloteleke ku tirha hi matimba tanihileswi ku nga ri ki na xa mahala. “Kuhava lexi nga ta ta u etlele eka misava leyi, xin’wana na xin’wana xa kahle lexi u xi kumaka xi ta hi ku tirha hi matimba,” wa hlamusela.

Loko a langutisa emahlweni, Mhelembe u vula leswaku milorho ya yena i ku tlangela xipano xa rixaka. “Norho wa mina i ku tlangela Baby Proteas ya malembe ya le hansi ka 21 ya xipano xa rixaka. Ndzi hlambanyile leswaku a ndzi nge tshiki ntlango lowu ndzi nga se fikelela kwalaho,” wa gimeta