PRIMROSE A TLAKUKA EKA NETBALL

Hi Themba Chauke

Loko riqingo ra Primrose Mpofu ri rila, a nga langutelanga leswaku ri nga va ra nkoka, a ri fanisa na riqingo rin’wana na rin’wana leri a ri kuma hi ntolovelo. Kambe loko a ri veka endleveni, u kumile leswaku leri a ku nga ri riqingo ra mani na mani.

Eka tlhelo rin’wana a ku ri xandla xa mutshamaxitulu wa xiyenge xa netball xa xifundzakulu, loyi a n’wi rhamba ku nga ri ntsena ku teka xiave, kambe ku ri ku rhangela xipano xa vadzaberi lavakulu va xifundzakulu lexi nga na vutihlamuleri byo hlawula vatlangi va rixaka va malembe ya 17 na 21 ku ya eka thonamete leyi languteriweke ku khomiwa eka xifundzantsongo xa Vhembe.

U vile na matitwelo yo hlaya hi nkarhi wun’we endzhaku ka riqingo. “A ndzi ri na mihloti ya ntsako,” ku tsundzuka Mpofu. “Lexi teke emiehleketweni ya mina ro sungula a ku ri leswaku va vonile vuswikoti bya njhani eka mina leswi endleke leswaku ndzi rhangela xipano?”

Eka Mpofu, loyi a nga mutlangi loyi a tinyiketeleke, tlhelo mutumbuluxi wa xipano xa netball xa Queens eGiyani, ku thoriwa ka yena swi twakala ku fana na ntshembho leswi tlheleke swi tisa na ku kanakana loko a ta fikelela ntirho lowu a hlawuleriweke wona.

U vula leswaku u tshamela ku tivutisa leswaku u ya xi fambisa njhani xipano xa vadzaberi lava nga na ntokoto loko a languta vutihlamuleri byo fambisa xipano xa vadzaberi xikan’we na vatlangi ku katsa na xipano xa xithekiniki hi ku angarhela.

U kombisile leswaku mahungu lawa ya nyanyulo, ya ta na mitlhotlho tanihileswi sweswi a bohekaka ku languta ta ndyangu wakwe, ntirho wakwe xikan’we na migingiriko ya yena ya mitlangu. “Ku hlawuriwa loku swi ndzi veka eka xiyimo xin’wana hikuva ndzi fanele ku ringanisa swilo hinkwaswo, ku va wansati ekaya, ku va mutirhi entirhweni, xikan’we na ku va mufambisi wa xipano xa vadzaberi lavakulu,” wa hlamusela.

Ku kota ku hlula ntlhotlho lowu, Mpofu u vula leswaku u tshembhela eka nseketelo wa ndyangu wa yena na vatirhikuloni. “Vatirhikuloni na mininjere wa mina, ku katsa na ndyangu wa mina, ngopfu-ngopfu nuna wa mina va ndzi seketela swinene,” ku vula yena.

Loko a vutisiwa leswaku i yini lexi endlaka leswaku a tirha hi matimba hambileswi ku nga ntshikelelo eka matlhelo hinkwawo, Mpofu u vurile leswaku u hlohloteriwa hi vatlangi lavantsongo lava langutelaka eka yena. “Ku tinyiketela ka vona hi ku fikelela eka vutiolori, ku tikhoma kahle xikan’we na nhlonipho wa vana lava swi endla leswaku ndzi tiya ndzi navela ku endla swo hundza leswi,” wa hlamusela.

Hi ntokoto lowu a nga na wona, ripfumelo, xikan’we na ku tinyiketela, Mpofu u na hungu eka vatlangi lavantsongo va netball lava navelaka ku humelela evuton’wini. “Swin’wana na swin’wana swa koteka, ntsena loko u veka miehleketo, mbilu na moya eka leswi u lavaka ku swi fikelela,” wa hlamusela laha a va hlokoteleke leswaku va fanele ku rhangisa Xikwembu eka swilo hinkwaswo leswi va swi endlaka leswaku vumundzuku bya vona byi ta katekisiwa.