XIPANO XA BEBS XA TSHEMBHISA

Hi Themba Chauke

Xipano xa bolo ya milenge xa Bebs kusuka emugangeni wa ka Ndengeza, xi pfurile pfhumba ra xona eka ligi ya Castle hi matlangelo ya kahle, endzhaku ka ku hlula hi xipano xa Vafana va Golden City hi 3-1 emugangeni wa ka Siyandhani.

Mbuyelo lowu wu tiyisisa ku hlula ravumbirhi hi ku landzelelana leswi tiyisisaka xiyimo xa vona tanihi valweri va xidlodlo xa ligi. Kusukela loko mpepe yi ba, Bebs hi yona leyi a yi tikomba yi tiyimiserile hi ku lawula ntlango exikarhi ka rivala xikan’we na ku tshikelela xipano xa le kaya.

Loko ku langutisiwa matlangelo ya xipano, xikoro a xi ta va xi ri ehenhla swinene loko a va kotile ku tirhisa nkarhi lowu a va ri na wona. Eka xiphemu xo sungula, va tlangile hi mikarhi yo hlaya tanihileswi a va tsandzeka ku kora. Kambe leswi va swi lulamisile eka xiphemu xa vumbirhi.

Kasi matlangelo ya xipano ya vuriwa ku va ya antswa endzhaku ka n’wini lontshwa wa xipano Joseph Ngomani, loyi ku fika kakwe swi nga tisa ku cinca eka xipano. Ngomani u vula leswaku u rhangisa vuswikoti bya le kaya, laha a lavaka vatlangi kusuka eka miganga yo hambana-hambana ku endla xipano xa vuswikoti swinene.

 “Kusukela loko ndzi tekile matomu, ndzi cincile tindlela to kuma vatlangi,” ku vula Ngomani. “A ndzi tirhisi ntsena vatlangi va muganga wun’we, ndzi jika-jika na miganga ndzi lava vatlangi va vuswikoti, hi swona leswi endlaka leswaku mi vona ku antswa eka matirhelo ya xipano loko mi fananisa na malembe lama nga hundza.”

Ngomani u vurile leswaku ku teka ka yena xipano a ku nga ri ku xava xiyimo, kambe a ku ri ku yisa emahlweni phurojeke leyi a yi ri eka nxungeto wa ku wa. N’wini wa xipano loyi a kolwe hi yo oxa hi tihakelo ta le henhla to fambisa xipano u n’wi landzile a n’wi kombela leswaku a teka xipano ku tiyisisa leswaku xipano xi nga fi.

 “N’wini wa xipano wa khale u lahlile thawula, a vula leswaku a nge he swikoti ku fambisa xipano laha a lavaka leswaku ndzi xi yisa emahlweni. Ndzi pfumerile hikuva ndzi rhandza ntlango wa bolo ya milenge, na leswaku a hi nge cukumeti vana lava na ku va alela nkateko ku ya emahlweni na ntlango wa bolo ya milenge,” ku vula yena.

Sweswi xipano xi nga le hansi ka vufambisi bya Ngomani, u vekile ku navela ka yena erivaleni. Xikongomelo xa yena i ku heta ligi a ri emaninginingini leswaku a ta tlakusiwa ku ya eka Ligi ya ABC Motsepe. “Kuhava swin’wana hi swi lavaka ehandle ka sweswo,” u ya emahlweni.

Kasi ntshembho wa xipano wu tlakukile swinene. Endzhaku ka mbuyelo wa mitlangu yimbirhi wa kahle, xipano xa Bebs xi sungula ku tlakusa rivilo leri lavekaka ku kota ku tlakusiwa, naswona matirhelo ya xona ya sweswi ya kombisa leswaku a xi nge hunguti rivilo sweswi.

Kasi xipano lexi a va tlanga na xona xa Vafana va Golden City, va ha ku fika tolo eka ligi ya Castle endzhaku ka ku tlakusiwa nguva leyi hundzeke. A ku se tiviwa swo tala hi xipano lexi, matlangelo ya vona endzhaku ka ku hlula eka ntlango wo sungula na ku hluriwa eka ntlango wa vumbirhi swi kombisa leswaku va ha lava-lava ndlela ya matlangelo. Swi nga ha endleka leswaku hi ku famba ka nkarhi va va xipano lexi nga tekeriwaka enhlokweni.