NTLHANU WA MALEMBE KUMBE NDZIHO WA LE HENHLA

Hi Themba Chauke

Khoto ya Mabindzu ya Giyani, yi gwevile vahlapfa vambirhi hi siku ra 09 N’wendzamhala 2025, ku tshama ekhotsweni malembe ya ntlhanu endzhaku ka ku kumeka na mafole yo ka ya nga pfumeleriwanga. Leswi swi ta endzhaku ka loko maphorisa ya kumile vuhlori hi siku ra 01 N’wendzamhala bya leswaku ku na timovha timbirhi ta ti Toyota Corolla to basa leti a ti rhwele mafole yo ka ya nga ri enawini ti huma eMusina ku kongoma eTzaneen exifundzenintsongo xa Mopani.

Hi ku landzela ku lumiwa ndleve, maphorisa hi ku tirhisana na tikhamphani ta varindzi va landzelerisile timovha leti egondzweni ra R36. Loko timovha leti ti voniwa eka gondzo leri, maphorisa va ti yimisile kutani ti dya thayela ti kongoma endhawini ya tifeme ya Tzaneen.

Maphorisa ya sale ndzhaku timovha leti ku kondza timovha leti ti siveletiwa kusuhi na le chela mafurha. Maphorisa ya kumile timovha leti ti layichile mafole yo ka ya nga ri enawini lawa ku vuriwaka leswaku ya durha R180 000. Vaehleketeleriwa ku nga Thabani Sibanda wa malembe ya 32 na Nkululeko Ncube wa malembe ya 49, va khomiwile xikan’we-kan’we endhawini liya.

Nandzu wu hundziseriwile exifundzenikulu xa Limpopo eka xiyenge xa vulavisisi hi ku rhangeriwa hi Sejeni Chuene Mokwele. Hi nkarhi wa ndzavisiso, Mokwele, u tlhele a kuma leswaku un’we wa vaehleketeleriwa Ncube, a ri etikweni swi nga ri enawini.

Leswi swi endlile leswaku a tlhandlekeriwa nandzu wo tlula nawu wo nghena laha tikweni ehenhla ka yena. Lavambirhi va rhangile va tivonakarisa emahlweni ka khoto ya Majisitarata wa Tzaneen hi siku ra 02 N’wendzamhala 2025, laha nandzu lowu wu hundziseriweke ku ya tengiwa ekhoto ya Vugevenga bya Mabindzu ya Giyani hi siku ra 09 N’wendzamhala 2025.

Sibanda u nyikiwile xigwevo xa malembe ya ntlhanu ekhotsweni kumbe ku hakela ndziho wa R300 000, loko Ncube a nyikiwile xigwevo lexi fanaka kambe ku hambana ndziho laha a faneleke ku hakela R100 000. U tlhele a nyikiwa xigwevo xa lembe rin’we ekhotsweni xo nghena etikweni swi nga ri enawini kumbe ndziho wa R10 000.

Hinkwavo ka vona va vuriwa ku va va nga ringanelanga ku khoma swibamu. Khoto yi tlherile yi lerisa leswaku timovha timbirhi ta ti Toyota Corolla ti tekiwa ku va ehansi ka vulawuri bya mfumo.

Khomixinara wa maphorisa ya xifundzakulu xa Limpopo Lieutenant Jenerali Thembi Hadebe, u amukerile mbuyelo wa xigwevo na ku hoyozela ntokoto wa valavisisi. “Leswi swa hlohlotela ku vona matirhelo ya le henhla ya vulavisisi na ku tirha hi ku hetiseka, milandzu yi nga ha tirhiwa hi ku hatlisa hi matirhelo lama fanaka,” ku vula yena.