BIG MOSS A TSUNDZUKIWA

Hi Pilot Manganyi

Nhlangano wa Mfumo wa Timasipala ta Afrika-Dzonga (SALGA), exifundzenikulu xa Limpopo a wu khomile nkhuvo wa ku tsundzuka Moses Maluleke, khale ka Meyara wa Masipala wa Collins Chabane. Nkhuvo lowu wu vile wu thyiwa SALGA Moses “Big Moss” Maluleke Municipal Awards 2026, na swona a wu khomeriwile endhawini ya vuwiselo ya The Ranch, ehandlenyana ka doroba ra Polokwane. Makungu ya nkhuvo lowu ku vile ku xiximiwa ka matirhelo, vurhangeri, vukorhokeri, mabaselo ya doroba, matirhiselo ya mali na vumaki bya masipala.

Masagwati lawa ya vile ya thyiwa hi ku xixima khale ka xirhonkulu xa vukorhokerhi bya le matikoxikaya khale ka meyara Moses Maluleke. Maluleke a xixima timasipala leti a ti tirhisa mali hi vurhon’wana, ku basa ka swiviko swa timali na ku tekela enhlokweni vaaki hi tindlela hinkwato. Swiyenge swa masagwati lawa a swi katsa matirhiselo ya mali leyi nyikiweke timasipala, swiviko swa matirhiselo ya mali ya lembe na switatimende swa mali ya masipala.

Timasipala to tala ti kombisile ku va ti tirhile kahle. Masipala wa Makhuduthamaga wu rhangile emahlweni hi masagwati ya nkombo, Elias Motsoaledi wu tlurile na tsevu, Fetakgomo Tubatse wu tlula na ntlhanu, Ephraim Mogale wu tlula na mune. Tin’wana ta timasipala na tona ti kombisile matirhelo ya tona lamanene tanihi Molemole, Makhado na Polokwane.

Meyara wa Polokwane xikan’we mutshamaxitulu wa SALGA eLimpopo, mukhaselara Makoro John Mpe u havaxerile mbulavulo wa yena wa ku amukela vaendzi. U tiyisisile leswaku vurhangeri bya le matikoxikaya: “i nchumu lowu rhangeke emahlweni laha vukorhokeri byi faneleke ku cinca vutomi bya vanhu”. Makoro u ndhundhuzerile timasipala leti tirheke kahle ku va va tirhela mfumo hi ku hetiseka, matirhiselo ya mali hi vurhon’wana na vurhangeri bya timasipala.

Mpe u komberile leswaku ku va na ntirhisano na vutumbuluxi. “Mbuyelo lowu wu kombisa ku tiyimisela na vutshila bya xiyimo xa le henhla.  Hikokwalaho ka mapfhumba yo fana na Nhluvukiso wa Timasipala ta Swifundzantsongo hi le ku yiseni emahlweni vukorhokeri na ku vuyisela ku titshembha ka timasipala ematshan’wini. A hi yeni emahlweni hi hlohlotela timasipala ta le matikoxikaya, hi tlhela hi aka vumundzuku lebyinene” ku boxa Mpe.

Nkhuvo lowu wu khwatihatile ndzima ya matirhelo ya timasipala ta xifundzakulu xa Limpopo, laha na SALGA yi nga tiyisisa leswaku ku lemukiwa hi ndlela leyi swi ndlandlamuxa matirhelo eka timasipala.