MASIPALA WU ANTSWISA MAGONDZO

Hi Pilot Manganyi

Masipala wa Collins Chabane wu tekile goza ra ku ndlandlamuxa vukorhokeri bya vaaki, leswi swi ta endzhaku ka loko Meyara wa masipala Mukhanselara Shadrack Maluleke a tivisile hi ta ku akiwa na ku pfuxetiwa ka magondzo ya xirhendzewutana. Masipala wa Collins Chabane wu khomile miganga yo ringana 36, makungu ya ku antswisa magondzo ya wela ehenhla ka makungu ya vukorhokeri lebyi languteriweke ehenhleni ka malembe ya ntlhanu.

Ku ya hi meyara, magondzo ya xirhendzewutana yo ringana 31 ehenhleni ka 36 ya herile, mitirho leyi yi beriwile mavoko hi vaseketeri na vaaki hambileswi miganga yin’wana yi nga se swi fikelela. Mapatu ya muxaka lowu ya kota ku hlanganisa miganga yale matikoxikaya na madoroba, ya hunguta machayelelo na ku ndlandlamuxa matirhelo eka vaaki va le ka masipala wa xifundzantsongo xa Vhembe.

Masipala wi vile na tiphurojeke ta muxaka lowu malembe lama hundzeke. Leswi swi katsa miganga yo tanihi Bevhula (2 km), Mdavula (3 km), Mphambo (4.5 km), Phaphazela (2.5 km), na Matatani (2.2 km), na man’wana. Tiphurojeke tin’wana a ti katsa ku endliwa ka phevhumende na xikontiri, ku fana na magondzo ya le migangeni yo tanihi Maphophe na Maviligwe.

Meyara Maluleke u hundziserile magondzo ya swirhendzewutana lawa ya heleke eka miganga yo hambana-hambana na ku kunguhata ku basisa switarata ehenhleni ka miganga ya 36. U tlhele a kombisa ku tiyisisa ku tinyiketela eka ku fikelerisa vukorhokeri eka vaaki.

“Tiphurojeke leti ti tiyisisa ku tinyiketela ka hina ku ndlandlamuxa xiyimo xa ikhonomi ya matikoxikaya” lexi i xitatimende xa masipala. Vaaki lava va vuyeriwaka hi makungu lawa va amukerile vukorhokerhi lebyi, tanihileswi va nga kotaka ku fikelela swa xihatla hi xinkadyana, swifambo swa siku na siku na mafambiselo ya mabindzu.

Loko masipala wa ha langutanile na ku hetisa magondzo lawa ya saleke, vaaki va kombisile leswaku magondzo ya muxaka lowu ya tisa nhluvuko ematikoxikaya. Vaaki va le kusuhi, tanihi Valdezia va kombisile ku navela ku va ehansi ka vulawuri bya Collins Chabane leswaku na vona va ta vuyeriwa hi tiphurojeke ta muxaka lowu. “Loko na hina a hi wela ehansi ka vufambisi bya masipala wa Collins Chabane a hi nga ta hlupheka hi swifambo”, ku boxa Mbhazima Valoyi.

Vukorhokeri lebyi byi fambisana na xiphemu xa masipala lexi vitaniwaka Intergtated Development Plan (IDP) lexi langutanaka na ku ndlandlamuxa vumaki bya nkoka. Swiviko swa ku hela ka lembe swi kombisa vuyelelo wa vuvekisi hi tlhelo ra Mali ya Mpfuno wa Vumaki eka Masipala (MIG) na ntirhisano na Ajensi ya Magondzo ya Limpopo (RAL).

Tanihiloko miganga yo tala yi pfumalaka ndlandlamuko wa vumaki, masipala wa Collins Chabane wu veka xikombiso hi ku pfuxeta vumaki lebyi vuyerisaka vukorhokeri. Masipala wu komberile vaaki ku va va veka mavonelo tanihiloko wu langutanile na ku hetisa magondzo lawa ya saleke.