PHALABORWA UNITED YI BUKUTA
Hi Themba Chauke
Xipano xa Phalaborwa United lexi tlangeke hi ku tsana eka Ligi ya ABC Motsepe, kambe xi tipfuxa hi ku bukuta ntsengo wa R100 000, eka yin’wana ya tithonamete to tika, yi tlhela yi va na swivulavula leyi a yi khomeriwile emugangeni wa le Shawela eGiyani, endzhaku ka ku hlula xipano xa Novela eka ntlangu lowu a wu taleriwile hi hoyihoyi.
Eka ntlangu lowu, n’watipepe a swi tikomba a hluriwa hi ntlangu tanihileswi swiboho swa yena a swi hlundzukisa vatlangi na vaseketeri. Nkwetlembetano wu vile kona endzhaku ka loko n’watipepe a nyikile xipano xa Phalaborwa United penati leswaku xi ringanisa ti ku 1-1.
Endzhaku ka nkarhi, xiyimo xi vuye xi nyanya swinene, loko n’watipala wa xipano xa Novela a nyikiwa karata ro tshwuka. N’watipala u arile ku huma erivaleni, a vula leswaku a nga endlanga nchumu lexi nga endlaka leswaku a nyikiwa karata ro tshwuka. Leswi swi endlile leswaku ntlangu wu yima nkharhinyana tanihileswi a fanele ku huma ku ya hi valawuri va ntlangu.
Ehandle ka ku kombisa ku vilela exikarhi ka vatlangi va Novela na vaseketeri va vona lava a va hehla n’watipepe hi matikhomelo ma yena, n’watipepe u yimile hi xiboho xa yena leswi endleke leswaku ku tekiwa xiboho xo nyika khapu eka Phalaborwa United ntlangu wu nga si hela. Leswi swi kwatisile van’wana vaseketeri lava vuleke leswaku xipano xa Phalaborwa United a xi khomiwa bya tandza loko swin’wana swipano swi khomiwa tanihi maribye eka thonamete leyi. Ku tlhela ku vuriwa leswaku eka wun’wana ntlangu va tlangile ku ringana na xin’wana xipano kambe va ala ku teka tipenati va vula leswaku va tsutsumela eka wun’wana ntlangu, laha ntlangu wa kona wu nga vuya wu tlangiwa nakambe laha va nga wu hlula, laha namuntlha ku humelelaka leswi.
Xipano lexi kumeke xiyimo xa vunharhu xi rilisiwile hi R10 000, loko xa vumbirhi xi kuma R50 000, kasi Phalaborhwa yi kumile R100 000, laha va vuleke leswaku va ta nyikela mihlangano ya vaaki yinharhu 10 000 ha wun’we, leyi katsaka xipano xa bolo ya milenge xa vadyuhari xa Vakhegula-Vakhegula, phurojeke ya vanhu lava hanyaka na vutsoniwa ya ka Xikhumba na Shawela Drop-in Centre, leyi hlayisaka vana lavantsongo nindzhenga.