PAPA PENNY WA TSAKA KU TIRHA NA VAAKI  

Hi Themba Chauke

Eric Nkobane loyi a tivekaka swinene hi vito ra Papa Penny eka swa vuyimbeleri, i khale ka xirho xa vandla ra tipolitiki ra ANC na MK. U vula leswaku wa tsaka ku tirha na vaaki kusuka ehansi ku nga ri epalamende, laha a nga vula leswaku swirho swa le palamende a swi koti ku hlangana na vaaki lava va swi hlawuleke.

Endzhaku ko tirha nkarhinyana epalamende ehansi ka vandla ra MK, u amukeriwile ximfumo hi vandla ra Floyd Shivambu ra Africa Mayibuye, eka ntirho lowu a wu khomeriwile eJoni hi Ravunharhu. Loko a vutisiwa hi kusuka ka yena eka vandla ra MK ku ya eka vandla ra Africa Mayibuye, Papa Penny u vule leswaku leswi a swi n’wi vilerisi nakantsongo hikuva sweswi u ta va a tirha na vanhu hi ku kongoma kusuka ehansi, ku nga ri epalamende laha a swi nga olovi ku hlangana na vahlawuri.

“Ndzi ntshuxekile swinene loko ndzi tirha na Mayibuye, hikuva ndzi na nkarhi wa kahle wo ya hlangana na vanhu hi ku kongoma. Laha hi kona ku nga na ntirho,” wa hlamusela. “I ntiyiso leswaku epalamende ka tsakisa laha na lahaya, ngopfungopfu loko u vitaniwa “muchaviseki” kambe loko swi ta eka ntirho, a swi kona swo langutana na ntirho wa le hansi. Hi swona leswi endlaka leswaku ndzi va eka vandla lerintshwa ra Mayibuye,” ku vula yena.

Migingiriko ya Papa Penny ya tipolitiki yi sungurile ku voniwa hi vanhu hi malembe ya va 2014, endzhaku ka loko a kondleterile ku akiwa ka patu ra xikontiri leri kongomaka emugangeni wa ka Nkuri. Leswi swi ta endzhaku ka loko a sorile vufambisi bya masipala wa Giyani emahlweni ka ntshungu hi nkarhi wa ntshamo wa huvo ya masipala, laha a sola meyara wa Giyani hi ku rhangisa emahlweni khale ka Meyarankulu wa xifundzantsongo xa Mopani Joshua Matlou, ku nga ri vukorhokeri bya vaaki na nhluvukiso wa le Giyani.

Hi nkarhi wa njhekanjhekisano wo hisa, u tshikelerile swinene hi ta ku cheriwa xikontiri eka patu leri kongomaka emugangeni wa ka vona. Endzhaku ka sweswo, patu ri vuye ri akiwa ri kongoma eka Nkuri, leswi nga endla leswaku vanhu vo hlaya va tshembha leswaku hi yena a ri swakwe la nga lwela phurojeke ya vaaki. Leswi swi endlile leswaku a duma swinene eka vaaki, laha vo tala na sweswi va ha n’wi hluvulelaka xidloko hi ku tisa xikontiri eka vaaki.

Kusukela loko a sukerile vandla ra ANC, swi tikomba Papa Penny a ta hlangana na ntshava ku khorwisa vaaki leswaku a nga ha kota ku hlohletela timhaka ta vukorhokeri ehandle ka vandla leri fumaka. Loko a angula swivutiso hi mitlhontlho leyi a nga langutana na yona, Papa Penny u vule leswaku wa ha tiyimiserile ku antswisa vutomi bya vaaki na ku yisa vukorhokeri byo antswa eka vaaki.

“Ndzi murhumiwa eka vanhu, na swona matimu ya mina ya tivulavulela. Ndzi ta tiyisisa leswaku Giyani ya hluvuka na leswaku vantshwa va kuma mitirho,” ku vula yena. “Kuhava un’wana ndzi n’wi vonaka loyi a tiyimiseleke ku lwela vanhu ku tlula mina. Hi swona leswi endlaka leswaku ndzi tshembha leswaku vanhu va le Giyani va ta kuma swo tala eka mina loko ndzi ri eka Mayibuye ku nga ri eka ANC,” wa gimeta.