PEACE MAKERS NA HATSHAMA BUCKS TI TLANGA

 Hi Themba Chauke

Xipano xa Peace Makers kusuka emugangeni wa ka Mninginisi xi bohekile ku amukela ku tlanga ku ringana na xipano xa Hatshama Bucks, eka ntlangu wo nyanyula wa Ligi ya LFA lowu a wu tlangeriwa emugangeni wa ka Makosha hi Sonto.

Hi ku tlanga ekule na le kaya, Peace Makers a yi tsandzeka ku landzelela rivilo ra ntlangu loko ntlangu wa ha ku sungula, leswi nyikeke vaseketeri va le kaya ntshembho wa leswaku Hatshama yi ta lawula ntlangu ehenhla ka vayeni.

Xipano xa le kaya xi yisile ntshikelelo ka ha ri na nkarhi hi ku tlanga hi ku tiyimisela tanihi xipano xa le kaya. Hambiswiritano, loko xiphemu xo sungula xa ha ya emahlweni, Peace Makers yi kotile ku vuyelela entlangwini yi sungula ku lawula ntlangu.

Swi tikombile loko xiphemu xo sungula xi ri karhi xi fika emakumu, laha vayeni a va yisa ntshikelelo eka xipano xa le kaya, leswi endleke leswaku xipano xa le kaya xi kayivela emahlweni hi ku boheka ku sirhelela endzhaku. Hambiswiritano, ehandle ka leswi, swipano haswimbirhi a swi tumbuluxanga mikateko yo kota ku howisa laha swi nga ya eku wiseni hi 0-0.

Loko xiphemu xa vumbirhi xi vuyela, Peace Makers a yi tikomba yi ri na matimba na ku tyimisela ku kuma xikoro ku hlula. Hambiswiritano, Hatshama Bucks a yi lwa hi matimba ku papalata ku khomisa vaseketeri va le kaya tingana.

Ntlangu wu hundzukile rivala ra nyimpi leyikulu, laha swipano a swi tswhimbirisana enkaveni wa rivala na ku tsandzeka ku hundzula mikateko yo howisa, leswi endleke leswaku ntlangu wu fika emakumu hi ku tlanga ku ringana hi tandza-tandza.

Loko ka ha ri na mitlangu ya ntlhanu ntsena leyi saleke leswaku nguva yi fika emakumu, mbuyelo a wu tisanga ku cinca eka swipano leswi, tanihileswi swipano haswimbirhi swi nga le ka xiyimo xa le kule na ku tlakusiwa. Peace Makers yi le ka xiyimo xa vumune eka logo, loko Hatshama Bucks yi ri eka xiyimo xa vunkombo.

Loko a vulavula endzhaku ka ntlangu, mudzaberi wa xipano xa Peace Makers Samuel Baloyi, u vule leswaku swipano haswimbirhi swi tlangile kahle na hi ku tiyimisela kuhlula eka ntlangu lowu, kambe matlangelo a ma hambanile.

“Xipano xa mina xi sungurile hi ku tsana laha a xi boheka ku sirhelela kusuka emasungulweni, kambe hi ku famba ka nkarhi hi kotile ku fikelela laha hi nga va veka ehansi ka ntshikelelo. A ku ri na nkarhi lowu a ndzi ehleketa leswaku hi ta hlula eka ntlangu lowu, kambe hi hluleka ku howisa,”

Baloyi u yile emahlweni a vula leswaku swiphiqo swa swipano leswi a ku ri ku lahlekeriwa hi tibolo ku olova eka xiphemu xa vona. “Hi swona leswi ndzi nga ta vulavula na vatlangi va mina va le ndzhaku kusuka laha ku ya emahlweni leswaku hi swi lulamisa,” wa gimeta.