MBAMBA MENCISI I MATIMU

Hi Andrew Hlongwane

Kwalomu ka 363 ya vaakatiko va le Burgersdorp ehandlenyana ka doroba ra Tzaneen va kombisile ku tsaka va tlhela va tshembisa ku cukumeta mencisi na makhandlela endzhaku ka loko va kumile mphakelo wa gezi.

Meyara wa Masipala wa Tzaneen Odas Ngobeni, u endzerile muganga lowu a tlhela a va lumekela gezi. Eka bulo ra yena hi nkari wo lumeka gezi, Ngobeni u kombisile nkoka wa mphakelo wa gezi na leswaku vaakatiko va tirhisa gezi kahle.

Ngobeni u kombisile leswaku hi xitalo tinghozi ta gezi ti endleka hi loko vaakatiko va rivala switirhisiwa swa gezi swi ri ku tirheni na kona kun’wana swi endliwa hi loko vatswari va tshika vana va tlanga hi gezi.

Mphakelo wa gezi eka vaakatiko vo ringana 363 swi endlile ntsengo wo ringana R7.8 wa timiliyoni.

Eka mphakelo wa gezi lowu swi endlile nkateko wo endlela vaakatiko va 28 mitirho eka swivandla swo hambana-hambana leswi lavekaka eka tiphurojeke ta muxaka lowu.

Meyara Ngobeni u kongomisile marito yo khensa eka swirho leswi nga seketela eka pfhumba leri. U tlhele a kongomisa eka va Eskom eka vuxaka bya vona na va masipala wa Tzaneen

“Xikongomelokulu i ku kombisa na ku kombela leswaka hi va na ntirhisano. Va khale va kombisile leswaku voko rin’we a ri nusi hove. Loko hi tirhisana hi nga cinca vutomi bya vaakatiko vo tala”, ku gimeta Ngobeni.