VADYUHARI VA HLOHLETERIWA HI VUTIOLORI

Hi Themba Chauke

Masipala wa Giyani wu langutanile na timhaka ta rihanyo ra vadyuhari hi ku khoma mitlangu ya vadyuhari erivaleni ra mitlangu ra Giyani. Pfhumba leri ra nkoka ri endleriwile ku tlakusa mahanyelo ya kahle eka vadyuhari, leswi kokeke rinoko eka vatekaxiave ku va xiphemu xa ntirho lowu eka mitlangu yo hambana-hambana, hi ku tirhisa mongo lowu nge “Ku tlangela vudyuhari bya nkhinkhi”

Loko malembe ma ri karhi ma hlaya, swi tlhela swi ta na nhlayo ya le henhla ya nxungeto wa vuvabyi lebyi hlaselaka masocha ya miri lama tsanaka. Leswi hi swona swi endleke leswaku masipala wu ta na makungu lawa ku lwisana na mavabyi.

Loko a vulavula hi ku yimela meyara, mukhanselara Christina Zitha u vurile leswaku ku tinghenelerisa eka migingiriko ya vutiolori i mhaka leyi bohaka eka ku lwisana na mavabyi lama fambelanaka na ku kula.

“Leswi hi swona swi nga na nkoka eka n’wina leswaku mi tinghenelerisa eka mitlangu kumbe yin’wana migingiriko ya vutilolori leswi endlaka leswaku mi tshama mi ri na matimba. Miri lowu tshamelaka ku famba wu tshama wu hanyile, na swona hi lava ku vona vadyuhari vatsongo ku endzela madokodela,” Zitha u byela vatekaxiave. Mitlangu ya vadyuhari a yi katsa mitsutsumo ya 400 wa timitara na 800 wa timitara.

Zitha u vule leswaku mitlangu ya vadyuhari yi na nkoka ku kondletela vun’we bya vaaki na miri ya rihanyo lerinene eka vadyuhari va le Giyani. “Hi ku kondletela maendlelo lama vadyuhari va tshamaka va ri ku endleni ka vutiolori na ku hlangana loko hi hala tlhelo mimiri ya vona yi tshama yi tiyile, masipala wu rhumela rungula ro twala hi nkoka wa rihanyo lerinene,” u ya emahlweni.

Kuya hi Zitha, vahluri eka miphikizano leyi veke kona va ta ya yimela masipala eka xifundzantsongo. Loko va kota ku hlula kona rendzo ra vona ri ta ya emahlweni, hi kuya phikizana eka xifundzakulu.