KU NAVELA KA MASIPALA SWI XAXA

Hi Themba Chauke

Xipano xa Masipala ku suka eka Wadi 10 emugangeni wa ka Ngove, xi vonile ku navela ka xona eka xidlodlo xa Khapu ya Meyara wa Giyani swi xaxa hi mugqivela endzhaku ka ku hluriwa eka ntlangu wa tisemi-fayinali hi Secha-Six xa le Wadi 18 emugangeni wa ka Muyexe, eka ntlangu lowu a wu khomeriwile erivaleni ra mitlangu ra Giyani.

Ntlangu lowu a wu tika swinene, wu vonile Masipala yi rhanga emahlweni hi 2-0 eka xiphemu xa vumbirhi, kambe xi ya hluriwa 3-2 hi tipenati endzhaku ka loko swipano swi tlangile ku ringana hi 2-2 eka xiphemu xo engetela.

Masipala yi nghenile eka tisemi-fayinali yi khomile ntikelo wa matimu eka mphikizano, laha vahlaleri a va tshembha leswaku hi yona yi nga ta hlula eka ntlangu lowu. Ku nga si ngheniwa eka lembe ra 2017, wadi 10 a yi wela eka swipano leswi a swi ri na vulawuri eka Khapu ya Meyara, hi ku tshamela ro kuma xidlodlo leswi endleke leswaku xi va xipano xo tika ku xi hlula.

Ntlangu wa tisemi-fayinali hi mugqivela a wu voniwa hi vaseketeri va xipano tanihi lowu xipano a xi ta wu hlula leswaku masipala yi tipfuxa ku teka goza ro teka xiyimo xa xona xa le henhla. Ehandle ka ku langutela ka le henhla, ntlangu wu sungurile hi ku nonohwa eka xipano xa Wadi 10.

Secha-Six, lava ngheneke eka mphikizano ehandle ka ntshikelelo, na swona a va tekeriwa ehansi hi vaseketeri, va tlangile hi ku tiyimisela na hi ku titshembha. Xipano xa le Wadi 18 xi lawurile ntlangu eka xiphemu xo sungula, va veka xipano xa Masipala ehansi ka ntshikelelo na ku veka vatlangi va ntokoto eka xiyimo xo tika.

Masipala a yi hluleka ku lawula ntlangu emasungulweni ya xiphemu xo sungula, va pfumelela Secha-six ku lawula ntlangu na ku xungeta vatlangi va le ndzhaku. Kasi eka xiphemu xa vumbirhi, ku vile na ku cinca eka matlangelo ya Masipala lava va nga vuya va tlanga hi ku tiyimisela. Nkarhinyana, swilo a swi languteka kahle eka Masipala, lava koteke ku howisa tigolo timbirhi ehandle ka n’wangulo eka vaphikizani va vona, laha va nga tiveka eka xiyimo xo lawula ntlangu. Vaseketeri va xipano a va angula hi ku ba huwa yo tlangela, va tshembha leswaku xipano xa vona xi tirhile hi ku enela ku hlayisa ndhawu ya vona eka tifayinali.

Kambe Secha-Six, yi arile ku lahla thawula. Xipano xa Wadi 18, xi nyikiwile penati hi nkarhi lowu a ku sale timinete titsongo leswaku ntlangu wu fika emakumu. Golo ya kona yi endlile leswaku Secha-Six yi va na ntshembho tanihileswi se a yi hlasela ku kuma golo yo ringanisa.

Ku gongodza ka vona swi vile na mbuyelo hi nkarhi wo hetelela wa nkarhi wo engetela. A ku sale ntsena minete leswaku ntlangu wu fika emakumu loko Secha-Six yi howisa nakambe ku ringanisa swikoro ku va 2-2, leswi endleke leswaku ntlangu lowu wu ya enkumeni.

Vatlangi va Secha-Six a va tibyerile loko va teka tipenati, laha va nga hlula hi 3-2, leswi swi va tekeke swi va yisa eka tifayinali ta khapu ya meyara, laha va nga ta ya hlangana na xipano xa wadi 21, xa le mugangeni wa ka Dzingidzingi.

Ku hluriwa ka masipala swi kombisa leswaku xipano xi hlulekile ku kuma nkateko wo tlhelela emaninginingini ya mphikizano lowu va kaleke va wu lawula, loko Secha-Six va kuma nkateko wo ya lwela xidlodlo eka tifayinali.