HOLOBYE A VALANGA NTANGA

Hi Themba Chauke

Holobye wa Swihlahla, Vunjoveri na Mbango, David Maynier, u endzerile ntanga wa swihari wa Kruger ku sukela hi ti 12 ku fika ti 15 Mhawuri 2026, ku ya hlangana na xipano xa le henhla xa vufambisi bya ntanga na ku ya kambela matirhelo yo lunghisa vumaki bya ntanga lebyi onhakeke hikokwalaho ka ndhambi ya Sunguti.

Rendzo ra Holobye a ri kambela ku onhaka ka vumaki leswi tlheleke swi khumbha swinene swiphemu swo hlaya swa ntanga wa swihari wa Kruger. Leswi onhakeke swi katsa magondzo, tindhawu ta byetlelo, vumaki bya mphakelo wa mati, leswi endleke leswaku ku pfariwa tin’wana tikamba ta vuwiselo. Kusukela kwalaho, xipano xa vufambisi bya ntanga na van’watikondiraka a va tirha hi matimba ku lunghisa lomu ku onhakeke.

Tikamba leti khumbhekeke ti katsa Shingwedzi, Mopani, na Letaba, laha Letaba a yi khumbhekile swinene. Hambileswi tindhawu tin’wana to dzima mitsonga eLetaba ti pfuleke nakambe, tindhawu tin’wana ta byetlelo ta ha pfariwile hikuva ti le ku lunghisiweni.

Kasi ntsengo lowu languteriweke ku lunghisa vumaki lebyi onhakeke entangeni wu vikiwa ku va kwalomu ka R950 wa timiliyoni. Ntanga wu tirhisile nkateko lowu ku nga ri ku lunghisa ntsena tindhawu leti khumbhekeke, kambe na ku antswisa tindhawu ta byetlelo na ku byi aka byi va tindhawu ta manguva lawa leswaku ti kota ku tiyisela eka makhombo ya ntumbuluko lama nga humelelaka mundzuku.

“Mitanga ya hina i swilo swa nkoka swa mbango, na swona ntanga wa swihari wa Kruger i rirhangu ra nkoka ra hari ya hina. Hi fanele ku tiyisisa leswaku ta hlayisiwa na ku antswisiwa,” ku vula Holobye.

Holobye u gimetile hi ku endzela ntanga hi ku haha ku suka eSkukuza a ya enkambeni ya vuwiselo ya Letaba, laha a kambeleke ntirho wo lunghisa lowu yaka emahlweni. Kasi tiyindlu ta byetlelo eka xiphemu xa A na B ti languteriwa ku pfula nakambe hi n’hweti ya Ndzhati. Swin’wana leswi nga le ku lunghisiweni entangeni swi katsa buloho ra le henhla ra Letaba, leri na rona a ri onhakile swinene hi ndhambi. Hambileswi buloho leri se ri pfuriweke leswaku ri famba swifambo, ntirho wo lunghisa lowu saleke wu le kusuhi na ku gimetiwa.

Hi nkarhi wa rendzo, Holobye u tlhele a burisana na vaendzi eka tindhawu ta byetlelo ta le ka Skukuza na le Letaba, ku twa hi tindleve takwe matitwelo ya vona, na ku tiva leswi faneleke ku antswisiwa. “Matitwelelo ya vaendzi ya fanele ku tekeriwa enhlokweni eka timhaka ta vuvekisi kuya emahlweni, tanihileswi hi lavaka mindyangu na vanghana leswaku va hlangana ku tiendlela matimu lama nga heriki hi nkarhi lowu va nga na wona entangeni,” wa gimeta.