SWABOHA A KUMA XIGWEVO XA VUTOMI

Hi Themba Chauke

Khoto ya xifundza ya Giyani yi gwevile Endlani Chavalala wa malembe ya 27, wo huma emugangeni wa ka Mapuve xigwevo xa vutomi hi nandzu wo pfinya xinhwanyetana xa malembe ya 16 enhoveni ya ka Maswanganyi etindhawini ta le Giyani.

Chavalala u marhekiwile xigwevo hi Ravumbirhi 20 Mhawuri 2026, endzhaku ko nyikiwa xigwevo xo pfinya na ku ringeta ku dlaya, na ku phangha eka mhangu leyi humeleleke hi Dzivamusoko 2023.

Khoto yi twile leswaku hi siku ra 13 Dzivamusoko 2023, xinhwanyetana xa malembe ya 16, na munghana wa xona wa malembe ya 15, va yile enhoveni ya le kusuhi emugangeni wa ka Maswanganyi ku ya tshova tihunyi. Loko va ri kwale nhoveni, Chavalala u va landzile a va xungeta hi ku va tlhava hi mukwana loko va nga endli leswi a swi lavaka.

Kwalaho u sungurile ku va phanghela tiqingo ta vona a nga si koxa leswaku va hluvula swiambalo. Chavalala u yile emahlweni a pfinya xinhwanyetana xa malembe ya 16 emahlweni ka munghana wa xona wa malembe ya 15. Endzhaku ko pfinya, u byerile swinhwanyetana leswi ku ambala swiambalo a swi ntshunxa. Xinhwanyetana xa malembe ya 15 a xi pfinyiwanga.

Vatwisiwa ku vava lava a va tshukile swinene va tlhelerile emugangeni wa ka Maswanganyi kuya mangala mhangu leyi eka un’wana wa vaaki. Va nyikile vuxokoxoko bya muehleketeleriwa leswi a swi katsa na swiamabalo leswi a swi ambarile loko a va hlasela.

Vaaki va sungurile ku hlotana na muehleketeleriwa, kambe va nga n’wi kumi hi siku ra mhangu. Vatwisiwa ku vava va yisiwile exitichini xa maphorisa laha va nga pfula nandzu wo pfinya na ku phangha.

Dokete ya nandzu lowu a yi nyikiwile xiyenge xa Madzolonga ya le Mindyangwini, Vusirheleri bya Vana na Milandzu ya Masangu (FCS), ehansi ka vulavisisi bya Sejeni Conny Mapengo. Ehandle ka matshalatshala yo hlotana na yena, Chavalala a nga kumekanga emasungulweni.

Hambiswiritano, endzhaku ka masiku manharhu ya ku pfinya na ku phangha, u vuye a khomiwa ku landzela mhangu yin’wana yo phangha emugangeni wa ka Gawula. Tanihileswi vito ra muehleketeleriwa a ri tiveka eka phorisa ra vulavisisi, Sejeni Mapengo u yile exitokisini kuya tiyisisa na ku n’wi konanisa hi mhangu ya ka Maswanganyi.

Xipano xa vulavisisi xi kotile ku endla nkombiso wa vutitivisi, laha vatwisiwa ku vava havambirhi va tiyisiseke leswaku hakanene Chavalala yi yena swaboha loyi a va hlaseleke. Chavalala a a ri exitokisini hi mikarhi hinkwayo leyi a tenga nandzu lowu ku fika laha a nga gweviwa hi Ravumune.

Khoto yi n’wi nyikile xigwevo xa vutomi hi ku pfinya, malembe ya nhungu hi ku ringeta ku dlaya, na 15 wa malembe yo phangha. Xigwevo xa nandzu lowu xi fikisa emakumu nandzu lowu a wu ri tikhoto ku ringana malembe manharhu, endzhaku ka mhangu leyi hi Dzivamusoko 2023.