MASIPALA WU SUNGULA KU HAKERISA VATSHAMI

Hi Themba Chauke

Masipala wa Giyani wu le makungwini ya ku sungula ku hakerisa vinyi vantshwa va tindlu na mabindzu elokixini ra ti-F eka tihakelo ta masipala endzhaku ka ku tsarisiwa na ku hundziseriwa ka tinhundzu kuya eka mavito ya vanhu. Masipala wu vule leswaku maendlelo lawa ya fambisana na nawu wa tihakelo ta tinhundzu eka masipala, xikan’we na ku landzelela xiboho lexi pasisiweke xa huvo ya masipala ku katsa tinhundzu letintshwa eka sisitimu ya tihakelo ta masipala.

  “Masipala wu lulamisile matsalwa ya wona ya tinhundzu ku kotisa masipala ku hakerisa tinhundzu leti faneleke elokoxini ra Giyani ti-F,” ku vula xitatimende.

Kuya hi muvulavuleri wa masipala Steve Mavunda, u vule leswaku tinhundzu leti khumbhekaka ti katsa tindhawu ta vutshamo ta 539 leti kumekaka elokixini ra ti-F, leti sweswi ti nga le ku lulamisiweni leswaku ti hluvukisiwa ku va vutshamo bya vaaki. Kambe u vule leswaku tindhawu leti a ti khumbhi tindhawu leti xavisiweke leti nga si akiwaka.

Mavunda u vule leswaku ku lulamisiwa ka matsalwa ya masipala a swi boha leswaku ku tiyisisiwa leswaku vinyi va tinhundzu leti va tsarisiwa ximfumo tanihi vinyi va tona leswaku swi va kona eka sisitimu ya tihakelo ta masipala. Leswi swi vula leswaku vinyi va tinhundzu leti va ta boheka ku hakela tihakelo ta tinhundzu eka masipala kuya hi tihakelo leti lavekaka leswi pasisiweke hi huvo ya masipala.

Masipala wu kombela vanhu hinkwavo lava khumbhekaka ku Kamba tiakhawunti ta vona loko ku hakerisiwa swi sungula na ku tiyisisa leswaku vuxokoxoko lebyi tsarisiweke eka tinhundzu ta vona swa fambelana. “Lava va nga si kumaka tiakhawunti ta masipala ku fika nkarhi lowu pimiweke va hlohleteriwa ku tihlanganisa na xiyenge xa tihakelo ku tiyisisa vuxokoxoko bya tiakhawunti ta vona,” ku vula Mavunda.

Kasi tindhawu leti ta 539 i tindhawu ta vutshamo leti kongomisiweke ku pfuna ku salela endzhaku eka swilaveko swa misava yo tshama. Ku salela endzhaku swi vile kona ku ringana malembe ya 20 laha masipala a wu nga si tsema switandi swintshwa.

Nkayivelo wa tindhawu ta vutshamo ta ximfumo wu ta endzhaku ka loko vanhu vo hlaya va tihlanganisile na tihosi leti lawulaka misava ya le dorobeni ra Giyani, hi xikongomelo xo lava tindhawu to tshama. Leswi swi endlile leswaku ku tumbuluxiwa na ku kula ka muganga wa Risinga View, ndhawu leyi akelaneke na lokixi ra ti-F na ku fambisiwa hi tihosi.

Ku hluvukisiwa ka tindhawu ta 539 swi languteriwa ku engetela tindhawu ta switandi ta ximfumo leswi nga ta rhula ndzhwalo wa ntshikelelo lowu veke kona nkarhi wo leha wa vukalo bya switandi endhawini leyi.