Swivandla swa mitirho ya vantshwa swi pfulekile
HI MKATEKO NDLOVU
Migingiriko yo rhumela swikombelo swa mitirho leyi yi humeke swa nkarhinyana yo pfuna vadyondzisi yi sungurile hi ti 22 Dzivamusuko 2025. Leswi swi ta endzhaku ka loko Ndzawulo ya Dyondzo yi humesile tiposo ta nkarhinyana to pfuneta vadyondzisi eswikolweni, ku ri ndlela ya ku pfuna vantshwa vo tala lava va pfumalaka mitirho etindhawini to hambana-hambana.
Mhaka leyi yi siyile vantshwa vo tala va tsakile swinene, laha va kombisaka leswaku kuva Ndzawulo ya dyondzo yi humesile mitirho leyi, swi ta pfuna vantshwa vo tala ku lwisana ni vusweti na ku papalata ku tinghenelerisa eka vugevenga tanihiloko tiko ra hina ra Afrika-Dzonga ri ri na xiphiqho xa mpfumaleko wa mitirho. Kuva Ndzawulo ya Dyondzo yi humesile swivandla swa mitirho swo fana na leswi, i ndlela yin’wana yo pfuneta vadyondzisi ni vadyondzi eka migingiriko ya siku na siku ya le swikolweni.
Swivandla leswi swa ntirho wa nkarhinyana swi pfumelela leswaku ku nghelela munhu un’wana na un’wana loyi a nga na malembe yo suka eka Khume Nhungu ku fikela eka Makume Nharhu Mune. Ndzawulo ya Dyondzo yi avile swivandla leswi hi ka Mbirhi laha xo sungula ku nga xivandla xa ku pfuna vadyondzisi na vadyondzi eka migingiriko leyi humelelaka etlilasini, kasi xa Vumbirhi i ku pfuna ku basisa rivala ra xikolo na ku pfuneta ku hlayisa nhundzu ya xikolo hi ndlela leyinene.
Ndzawulo ya Dzondzo yi kombela no hlohlotela vantshwa leswaku va tinghenelerisa eka mitirho leyi, laha va kombisaka leswaku munhu u fanele a kombela xivandla xa nitrho eka xikolo lexi xi nga le kusuhi na yena kusukela hi ti 22 Dzivamusoko ku ya fika ti 19 Mudyaxihi 2025. Va Ndzawulo ya Dyondzo va ya emahlweni va hlohlotela na vatsoniwa leswaku va tinghenelerisa eka ku endla swikombelo swa swivandla swa mitirho, laha va yaka emahlweni va tiyisisa leswaku eka swivandla leswi ku fanele ku nghelelela vanhu lava va nga ri ki na mitirho. Swikombelo leswi swi kumeka eka webusayiti ya sayouth.mobi.
“Un’wana wa vantshwa u kombisile leswaku ‘’kuva Ndzawulo ya dyondzo yi humesile swivandla swa mitirho ya nkarhinyana i mahungu yo tsakisa swinene hikuva tanihi vantshwa hi ta kota ku kuma mali leswaku hi ta fikelela swilaveko swa hina, naswona hi na ku tshembha leswaku mikarhi leyi taka ndzawulo ya dyondzo yi ta humesa swivandla swa mitirho ya nkarhi hinkwawo ‘’. Tinyiko wa hlamusela.
