Ndhambhi yi siya Vaaki va nga ri kahle
Hi Mkateko Ndlovu
Van’wamapurasi vo tala va sarile va visekile etindhawini ta Bloemhof endzhaku ka timpfula ta matimba leti leti ti nga dlaya swimilana swavona. Magidigidi ya tihektara ta swibyariwa etlhelo ka swiphemu swa nambu wa Vaal swi onhiwile hi nkarhi wa ndhambi leyi ya ha ku humelelaka.
Van’wamapurasi lava byalaka tiboncisi na tinyawa etindhawini ta Bloemhof na Christiana exifundzheninkulu xa North West hi vona va khumbekeke swinene laha van’wana va vuleke leswaku a va nge vi na mali yo tlhela va byala swibyariwa swa vona.
Van’wamapurasi va kombisa leswaku swibyariwa swo tala swi le ndzeni ka mati, laha vakombisaka leswaku kusukela va xavile purasi leriya Makume-Mbirhi-Ntlhanu wa malembe lawa ya hundzeke mhaka leyi yihumelela ra vu Nkombo. Hambiswiritano va kombisa leswaku xiendlakalo xa muxako lowu xi va heta matimba hikuva va lahlekeriwile hi macheleni yohlaya.
Timpfula ta matimba leti a ti ri kona a ti khumbhanga van’wamapurasi ntsena, kambe ti siyile na vaaki vo tala va nga ri na makaya. Makaya yo tala ya hahlukile etindhawini letiya leswi swi siyaka vaaki va nga ri eka xiyimo xa kahle. Van’wana va vaaki va kombisa leswaku xiyimo sweswi xi tikile ngopfu naswona makaya ya kwalomu ka 170 ya khumbekile hikokwalaho ka timpfula leti ta matimba.
Va vula leswaku a va switivi leswaku va fanele ku hanya njhani ku ya emahlweni tanihileswi van’wana makaya ya vona ya onhakeke loko va pfumala na ku kuma tindlela to tihandzela swakudya. Va kombisa leswaku van’wana va vaaki va tshama eka tindlu ta nkarhinyana naswona enkarhini wa sweswi va hanya hi ku nyikeleriwa hi swakudya.
Vaaki va kombela leswaku mfumo wu teka ndhawu eka mhaka leyi, laha va kombelaka mpfuno eka mihlangano yo ka yi nga ri ya mfumo, van’wamabindzu na un’wana na un’wana
loyi a tsakelaka ku pfuna. Va kombisa leswaku kuva vanhu va nghenisa xandla eka mhaka leyi swi ta tisa ku antswa eka vaaki va le Bloemhof naswona va ta khensa swinene. Masipala wa Lekwa-Teemane wu kombisa leswaku tanihi masipala va tshama va ri na vuxiyaxiya naswona va kombela lava tsakelaka ku pfuna leswaku va tivonakarisa va pfuna vaaki va le Bloemhof, naswona enkarhini wa sweswi va ta tiyisisa vuhlayiseki bya vaaki no va nyika
tindlu ta nkarhinyana .
