MEC a tlangela siku ra ku velekiwa hi ku nyikela swikolo leswi antswisiweke

Hi Mkateko Ndlovu

Hi siku ra 06 Mudyaxihi 2025, MEC wa Dyondzo wa eLimpopo, Mavhungu Lerule-Ramakhanya, u tlangerile siku ra ku velekiwa ka yena hiku nyikela swikolo etindhawini ta ka Malamulele. MEC, u nyikerile ximfumo swikolo swofana na John Xikundu Primary na Tshamisekani Primary leswi ndzawulo a yi karhi yi swi aka hi vuntshwa.

Hi nkarhi wa ntirho lowu, MEC a a ri na Meyara wa Masipala wa Xifundzhatsongo xa Vhembe, Cclr Fridah Nkondo, na Meyara wa Collins Chabane, Shadrack Maluleke, na Hosi Bohani Xigamani.

Ndzawulo ya Dyondzo yi komba ku tiyimisela ka yona ku antswisa swikolo etindhawini ta le makaya na le madorobeni, leswaku ku va na ndhawu yo olova ku dyondza ni ku dyondzisa. Tiphurojeke leti ti katsa ku lulamisiwa ka swakolo swa khale, ku akiwa tikamara letintshwa to tidyondzela, na ku basisiwa ka tihofisi.

Vaaki va le Xikundu na Xigamani va kombisile ku tsaka hi ntirho lowu ndzawulo yi wu endleka emigangeni ya vona. Meyara Maluleke u khensile MEC Mavhungu hi ntirho lowunene a wu endleleke eka ku hluvukisa dyondzo ya le makaya. U te: “Swilo leswi swa nkoka a swi talangi ku kumeka etindhawini ta le makaya, kambe MEC u endla vutomi byi va byi olova eka vana va le Collins Chabane leswaku va ta dyondza kahle.”

Loko Meyara a ya emahlweni u vurile leswaku va ta hlayisa swikolo leswi, tanihi vumundzu bya tiko. Meyara Maluleke na yena u kombisile seketelo wa yena eka dyondzo hi ku nyikele hi tintangu ta xikolo eka swikolo swa Khume Mbirhi hi nkarhi wa siku ra yena ra ku velekiwa enyangweni leyi nga hundza.