Meyara a sola Vugevenga
Hi Mkateko Ndlovu
Meyara wa masipala wa Collins Chabane cllr Shadrack Maluleke, u sola Vugevenga bya tihanyi lebyi nga humelela eka Malamulele B2, laha tinsulavoya ti nga nghena ti xanisa wa nhwana wa 17 wa malembe hi vukhale xikan’we no dlaya wa jaha wa 20 wa malembe hi vukhale.Meyara loko a twa mhangu leyi u vitanile nhlengeletano ya xihatla ni vaxiphorisa.
Maluleke u hundzisele marito ya ku chavelela hi mbilu hinkwayo eka ndyangu wa ka Khosa na ku kombisa ku vilela lokunkulu hi ku yimela Masipala. U kandziyisile leswaku swiendlo swo tano swa madzolonga swa vuharhi a swi fanelanga ku tiyiseleriwa naswona u komberile Maphorisa ya Malamulele na SAPS leswaku va tirha hi matimba eka vugevenga bya muxaka lowu. U komberile vaaki ku hlangana ku seketela ndyangu lowu khumbekaka, ku tshama va xalamukile, na ku pfuneta vatirhela-mfumo va nawu hi vuxokoxoko byihi na byihi.
Meyara Maluleke u tivisile makungu ya nhlengeletano ya xihatla na SAPS na vakhomaxiave va vaaki ku burisana hi magoza ya vuhlayiseki lawa nga heriki na ku kurisa magoza ya ntirhisano yo lwisana na vugevenga. ‘’A hi hlanganeni, hi vulavula, hi tirha hi vun’we ku sirhelela makaya na mindyangu ya hina. Vululami byi fanele ku tirhisiwa, naswona vuhlayiseki bya vaaki byi fanele ku rhangisa emahlweni’’ ku vula Meyara Maluleke.
Hambiswiritano meyara wa masipala wa xifundzhantsongo xa Vhembe Manana Fridah Nkondo nayena u yisile marito yak u chavelela eka ndyangu wa ka Khosa laha a nga kombisa leswaku u hlamarisiwa hi mahanyelo ya masiku lawa, vanhu va hanya ku fana ni swihari. Meyara u yi le emahlweni a khensa vaaki ku va va kotile ku seketela va ndhyangu eka nkarhi lowu wo tika.
“tanihi tiko ra Afrika-Dzonga hi fanele hikhomana hi va xilo xinwe hi lwisana na vugevenga na madzolonga
ya ku hambana ka rimbewu , xikan’we na ku khongelela tiko ra hina ’’Nkondo a hlamusela Fridah Nkondo u yile emahlweni a kombisa leswaku maphorisa va ti komba va tsandeka ku tirha mintirho ya vona hikuva masiku lawa kahari hava maphorisa yo famba na muganga ya rindza vaaki ni vusiku, maphorisa ya fanelel ya cicana ya laha kaya ya fanele ku ya tirha kule ,kambe maphorisa ya le kule ya fanele ya vuya hala kaya.
