Vuhandzuri bya Mahlo byi Rhangisiwa Emahlweni

Hi Themba Chauke

Ndzawulo ya Rihanyo ya Xifundzhankulu xa Limpopo yi vula leswaku yi tsakile kuva yi endla migingiriko yo hlawuleka ya vhiki hinkwaro yo endla vuhandzuri bya Mahlo, leyi yi nga sungula hi siku ra 12 Mudyaxihi 2025 ku fika ti 16 Mudyaxihi 2025.

Leri i pfhumba leri ri kongomisiweke eka ku tinyiketela ka Ndzawulo ku hunguta vuhandzuri lebyi byi saleleke endzhaku eka xifundzhankulu, xikan’we na ku tiyisisa leswaku vaaki va fikelela vukorhokeri bya nkoka bya vutshunguri bya mahlo. Pfhumba leri ra vuhandzuri bya mahlo, ri kongomisiwile eka ku nyika vuhandzuri lebyi byi lavekaka swinene eka vaaki lava va vabyaka mahlo, xiyimo lexi xi endlaka leswaku munhu a va bofu na ku tsandzeka ku hanya vutomi hi ku hetiseka.

Ndzawulo yi vula leswaku yi hlengeletile switirhisiwa leswi swi lavekaka xikan’we na vativi eka ntirho lowu ku ri matshalatshala ya ku endla leswaku vanhu vo hlaya va tlhela va vona xikan’we na ku hunguta ndzhwalo wa vanhu lava lavaka vuhandzuri bya mahlo eka xifundzhankulu.

Vuhandzuri bya mahlo, byi vuriwa kuva byi ri vuhandzuri lebyi byi koxaka macheleni yo hlaya swinene, naswona vaaki va tshembhela eka vutshunguri bya mfumo ku kuma mpfuno wa vutshunguri lebyi. Ku vuriwa leswaku ku tlula kwalomu ka 100 wa mamiliyoni wa vanhu emisaveni hinkwayo va na vuvabyi bya mahlo, naswona ehenhla ka nhlayo leyi, 17 wa mamiliyoni wa vanhu va hetelela va fe mahlo, kasi kwalomu ka 70 wa mamiliyoni ya vanhu emisaveni hinkwayo va vona hi ku kayivela.