Holobyenkulu a Khomisa Vaaki Pala

Hi Themba Chauke

Vaaki va le Rotterdam ehansi ka Hosi Duvula, va sarile va tikhomile xihlaya, endzhaku ka loko va rindzerile hi ntsako ku amukela Holobyenkulu wa Xifundzhankulu xa Limpopo, Dokodela Phophi Ramathuba, tanihileswi va vulaka leswaku hofisi ya Holobyenkulu yi tshembhisile leswaku Holobyenkulu u ta fika ku ta burisana na vaaki hi siku ra ti 12 Mudyaxihi 2025, endzhaku ka loko va hlanganile na Hofisi ya Holobyenkulu hi siku ra 22Dzivamusoko 2025, etihofisini ta Holobyenkulu etsindza wa Xifundzhankulu ePlokokwane.

Vaaki, Yindlo ya Vukosi xikan’we na vayimeri wa xinawu va Vukosi bya ka Duvula, a va yile eKhoto ya le Henhla ya Polokwane ku ya lwela timhaka ta Vukosi bya ka Duvula hi siku ra 22 Dzivamusoko 2025, laha va vulaka leswaku va tshembhisiwile leswaku va ta kuma vuendzi bya Holobyenkulu ku ta burisana na vona hi mhaka leyi hi siku ra 12 Mudyaxihi 2025.

Muvulavuleri wa Vukosi bya Hosi Duvula Justice Makhubela, u vurile leswaku vaaki a va lulamisile hi ndlela ya xiyimo xa le henhla laha a va tiyimiserile ku ya hlangana na Holobyenkulu tanihilaha a tshembhiseke ha kona. “Hi sonto wa ti 11 Mudyaxihi 2025, a hi ri na khoro yo lulamisela ntirho wo amukela Holobyenkulu hi siku ra 12 Mudyaxihi 2025 etindlwini ta vukosi bya Hosi Duvula, laha vaaki a va humile hi xitalo ku ta seketela pfhumba leri,” ku vula Makhubela.

U vurile leswaku hi siku ra ti 12 Mudyaxihi 2025, vaaki humile hi xitalo ni mixo swinene ku famba na swikhorokhoro swa vona na ku ya titsarisela ku tiyisisa leswaku hakanene i vaaki va le hansi ka Hosi Duvula, loko ka ha yimerile leswaku Holobyenkulu a fika ku ta burisana na vona.

“Loko ku ba awara ya khume nimixo, mukondleteri wa ntirho lowu Sydwell Mahlaule, u byerile ntshungu leswaku ‘nkarhi lowu a ku yimeriwile leswaku ntirho wu sungula hi wona walowu’ kambe loko hi langutisa evokweni ra Ximatsi, hi langutisa evokweni ra Xinene, hi langutisa ehenhla na le hansi ka misava, a ku nga ri na xikombiso xa vukona bya Holobyenkulu.” U ya emahlweni.

Endzhaku ka nkarhi va khomile pala ehandle ka nhlanga yo baleka ngati, vaaki va khomile ndlela hi nghoma ku ya tivisa Hosi leswaku vuendzi lebyi byi languteriweke a byi fikanga, loko van’wana va khoma ndlela ya Gondzo ra R81, ku kondza va ya fika ePolokwane, ku lava ku tiva leswaku Holobyenkulu a nga va a helerile kwihi.

Lexi vilerisaka vaaki swinene, hi leswaku vaaki va tirhisile macheleni yo hlaya lama
hlengeletiweke hi minyikelo ya vaaki, leswi swi katsaka matende na nkhaviso, varindzi,
swakudya na tihomu to hlaya ti tlhaviwile hi xikongomelo xo endla leswaku ntirho wo
amukela Holobyenkulu wu saseka ku tlhela ku dyiwa.

“Ntirho wu vuye wu sungula ehandle ka vukona bya Holobyenkulu, laha vaaki va nga
tivisiwa leswaku vuendzi lebyi a va byi yimerile a byi fikanga, naswona a va tivisiwanga hi ku
tsandzeka ka ku fika ka vuendzi lebyi,” wa gimeta, laha a nga vula leswaku va ta ya
emahlweni na matshalatshala yo lava ku tiva n’wangulo wa Holobyenkulu eka mhaka leyi.

Phephahungu ra Nthavela ri tihlanganisile na muvulavuleri wa Holobyenku, ku kuma
n’wangulo hi mhaka leyi, naswona loko hungu leri ri ya kandziyisiwa, n’wangulo a wu nga se
kumeka kusuka ehofisini ya Holobyenkulu.