Swaboha wa Muhlapfa a Gweviwa Vutomi.

Huvo ya Vuchuchisi xa Tiko (NPA), yi amukela xigwevo xa vutomi lexi xi marhekiweke muhlapfa wo huma etikweni ra Zimbabwe hi nandzu wo pfinya, hi Majisitarata wa Khoto ya Pitori. Vito ra swaboha loyi i Mulero Nyangero wa malembe ya 32, loyi a tshama eVupeladyambu bya Pitori. U tlherile a marhekiwa hi xigwevo xa malembe ya Ntlhanu ku tshama ekhotsweni hi nandzu wo phangha na ku twisa kuvava. Khoto yi lerisile leswaku swigwevo leswi swi fanele ku famba hi nkarhi wun’we, xikan’we na ku boha leswaku a nga ha ringenelanga ku khoma xibamu.

Hi siku ra ti 14 Mhawuri 2020, ni nhlikani, mutwisiwakuvava a ri ku tsutsumeni exitaratini xa Kloof eVupeladyambu bya Pitori, loko vavanuna vanharhu va humelela kusuka ekhwatini ra le kusuhi, laha va nga n’wi tshunelela, va n’wi koka-koka va nghena na yena ekhwatini laha Nyangero a nga pfinya wansati loyi.

Hi nkarhi lowu Nyangero a pfinya wansati, vavanuna lavan’wana vambirhi, a va ri ku n’wi beni, xikan’we na ku n’wi xungeta hi mukwana. Endzhaku ka sweswo, va sindzisile wansati ku rhumela mali hi ku tirhisa riqingo, va hetelela va n’wi boha mavoko laha va nga dya ehansi.

Mutwisiwakuvava u kotile ku tichucha, laha a nga tsutsumela epatwini, laha a nga kuma movha lowu wu nga n’wi heleketa ekaya. Kusuka kona u yile exitichini xa Maphorisa ya Vupeladyambu bya Pitori laha a nga mangala nandzu. Endzhaku ka vulavisisi, Nyangero u khomiwile hi siku ra ti 21 Nyenyenyani 2021 endhawini yo xavisa byalwa kona kwale eVupeladyambu bya Pitori, naswona a ha ri ehokweni ya tisulavoya kusukela nkarhi walowo.

Nyangero a nga tivonanga nandzu eka milandzu leyi a hehliwa hi yona xikan’we na ku kaneta swihehlo swa kuva a endlile vugevenga lebyi . Hambiswiritano, muchuchisi wa Mfumo Adv, Chester Molaba u nyikile vumbhoni byo tiya lebyi kombisiweke hi maphorisa ya vulavisisi bya nandzu na mutwisiwakuvava, leswi swi tiyisiseke leswaku hakanene Nyangero u endlile vugevenga lebyi.

Hi nkarhi wo nyikiwa xigwevo hi ku tirhisa vayimeri vakwe, Nyangero u komberile khoto ku hunguta xigwevo laha a vula leswaku u na nsati na vana vambirhi va malembe ya le hansi lava a faneleke ku va sapota. U tlherile a kombela khoto ku tekela enhlokweni leswaku a ri exitokisini ku ringana malembe ya Mune kusukela loko a khomiwile.

Muchuchisi Adv, Molaba, u vurile leswaku mfumo a wu fanelanga ku hunguta xigwevo hikuva Nyangero a nga kombisanga ku tisola eka vugevenga lebyi byo chavisa bya Madzolonga ya Rimbewu lebyi nga Xiphiqo etikweni. Adv, Molaba u tlherile a vula leswaku vugevenga lebyi a byi na vumunhu, i bya tihanyi, xikan'we na nsele ehenhla ka wansati loyi a tsandzeka ku tisirhelela.

Loko a nyika vuahluri, Majisitarata Themba Ndwandwe u pfumelelanile na mfumo leswaku vugevenga lebyi byi endliweke hi Nyangero a hi vumunhu na leswaku a nga kombisanga ku tisola. U yile emahlweni a vula leswaku maendlelo ya yena ya kombisa leswaku a nga hloniphi vavasati hikuva u khomile mutwisiwakuvava ku fana na xihari. Hikokwalaho ka leswi, u vonile swi nga ri na ntikelo ku hunguta xigwevo ehenhla ka Nyangero.

Xandla xa Mufambisi wa Huvo ya Vuchuchisi, Adv, Marika Jansen Van Vuuren, u hoyozerile ntirho
lowu endliweke hi muchuchisi na phorisa ra vulavisisi Kaputeni Mkhonto, lava tirheke ku vona leswaku xigevenga lexi xa gweviwa. U kombisile ntshembo wa leswaku xigwevo lexi xi kombisa leswaku NPA yi tinyiketerile ku lwisana na vugevenga bya madzolonga ku ya hi rimbewu.