Ti Rhosa hi ku Endlela Vahlapfa Mapasi

Hi Themba Chauke

Xiyenge xo lwisana ni Vukungundzwana eLimpopo, xi komhile vaehleketeleriwa vanharhu va malembe ya 37 ku fika eka 57, hi swiehlo swa vuxisi mayelana na ku nyika vahlapfa mapasi hi ndlela ya vuxisi.

Ku khomiwa ka vanhu lava swi ta endzhaku ka swivilelo leswi mangariweke hi siku ra ti 26 Khotavuxika 2024 na ti 23 Mhawuri 2024 hi mulavisisi eka Ndzawulo ya Xikaya. Mutirhi wa Ndzawulo ya Xikaya eSenwamokgope u mangarile leswaku vavasati vambirhi ni wanuna un’we va nyikile mapasi eka vahlapfa lava ngheneke etikweni swi nga ri enawini ehandle ka ku landzelela maendlelo ya xinawu lama lavekaka.

Mhaka leyi yi hundziseriwile xikan’we-kan’we eka xiyenge xa vulavisisi bya vukungundzwana exifundzheninkulu (ACIU) ku endla vulavisisi hi vuenti. Hi ku landzelela vulavisisi lebyi tsarisiweke exitichini xa maphorisa ya Sekgosese, ehansi ka xifundzhantsongo xa Mopani, milandzu leyi yi hundziseriwile eka Mufambisi wa Timhaka ta Vuchuchisi bya Vaaki ku teka xiboho, laha ku humesiweke xileriso xo khoma vaehleketeleriwa lava.

Hi siku ra ti 21 Mudyaxihi 2025, pfhumba ra xifundzhankulu xa Limpopo na xa Gauteng, ri landzelerisile vaehleketeleriwa laha va nga khomiwa. Vaehleketeleriwa lava i Jackson Mashapa Mantlhakga wa malembe ya 37; Elisabeth Motshidisi Mokoena wa malembe ya 41; xikan’we na Masesi Yvonne Lebisi wa malembe ya 57,
lava a va tivonakarisile emahlweni ka Majisitarata wa Khoto ya Senwamokgope hi Ravumune wa ti 22 Mudyaxihi 2025.

Hi nkarhi wa ntshamo wo tenga, nandzu ehenhla ka Mokoena wu suriwile loko ka ha endliwa vulavisisi hi maphorisa. Mantlhakga na Lebisi va nyikiwile beyili ya R2 000 hi munhu, naswona ku tengiwa ka nandzu swi hundziseriwile emahlweni ku ya eka siku ra ti 04 Mhawuri 2025.