Rendzo ra Xigurhuntsongo ri Kongoma eKZN

Hi Themba Chauke

N’wamatsambu, Lavani Maluleke, loyi a tivekaka swinene hi vito ra ‘Xigurhuntsongo’ u ta va a yisa emahlweni migingiriko yakwe ya swamatsambu tanihileswi a nga ta va a teka xiphemu eka migingiriko ya Matsambu ePietermaritzburg, Kwazulu-Natala, hi siku ra ti 08 Khotavuxika 2025, eka ntsutsumo wa Comrade Marathon. Ntsutsumo lowu wu ta sukela edorobeni ra Pietermaritzburg ku kongoma eDurban laha ku nga mpfhuka wa tikhilomitara ta 90.

Hi lembe ra 2024, Lavani u nghenelerile mphikizano lowu fanaka wa Comrade Marathon eKwazulu-Natala laha a tsutsumeke kwalomu ka 85.89 wa tikhilomitara kusuka eDurban ku ya ePietermaritzburg, naswona u gimetile ntsutsumo wa kona hi Khume ra tiawara na 45 wa timinete leswi endleke leswaku a kuma mendlele ya
bronze. Lavani u ta va a tlhelela ku ya lwela mendlele yo vuyelela. Kasi mendlele yo vuyelela swi vula leswaku munhu u kuma timendlele timbirhi loko a kota ku heta mpfhuka.

Lavani u nghenelerile eka mitsutsumo leyi yi landzelaka loko a ha kongoma eka Comrade Marathon ya 2025: Ntsutsumo wa 42.2KM hi tiawara ta Ntsevu; 2024 Soweto Marathon 42.2km; 2025 Wonderpark Marathon 42.2km; 2025 Two Oceans Ultra Marathon 56km; xikan’we na 2025 N12 Ultra Marathon 50km.

Lavani u tshembha leswaku u ta hlohlotela vantshwa lava va ha lavaka ku kuma tinyiko ta vona eka timhaka ta swamatsambu. Kasi muganga wa ka Xikundu, laha Lavani a humaka kona wu ta n’wi nyika nseketelo kusukela emasunguleni ku fika emakumu. Loko a tithemendhela u tirhisa xivulavulelo xa leswaku: “ehlisa moya, ku lawula mina, lexi i xa mina!’