Xikukwani Academy yi Khembetela Eleven Stars

Hi Themba Chauke

Xipano xa bolo ya milenge xa Xikukwani Academy xi sungurile pfhumba ro hlula eka xidlodlo xa mphikizano hi ku mbeyetela xipano xa Eleven Stars hi 3-2, eka ntlango lowu vasekeri a va yimile hi swikunwana ku kondza ntlangu wu fika emakumu. Mphikizano lowu wa masiku mambirhi, wu sungurile hi Mugqivela wu hela hi Sonto, naswona a wu khomeriwile ekaya ra Xikukwani Academy, erivaleni ra mitlangu ra ka Xikukwani.

Mbuyelo wa masagwadi a wu ri henhla, tanihileswi xipano lexi xi nga hlula xi tibukuteleke R8 000, kasi lexi landzelaka xi kumile R3 000, hambileswi yin’wana miphikizano leyi fanaka etindhawini ta Giyani yi nyikaka kwalomu ka R40 000, swipano a swi tiyimiserile ku lwela sagwadi leri tanihileswi a ku ri hava xipano lexi a xi khondla mavoko.

Ehandle ka ku hlangana na ntshikelelo wa matimba kusuka eka Eleven Stars loko ntlango wa ha sungula, xipano xa Xikukwani Academy xi kotile ku boxeketa eka timinete to sungula, laha xi nga howisa golo leswaku xi rhanga emahweni hi 1-0. Xipano xa Eleven Stara xi angurile hi ku hatlisa tanihileswi a xi hlasela bya tinyoxi, laha xi nga kuma phenati kutani xi ringanisa hi golo ti ku 1-1 ku nga se kongomiwa ekuwiseni.

Eka xiphemu xa vumbirhi, xipano xa Xikukwani Academy xi howisile golo ku nga se hela minete ntlangu wa ha ku sungula leswaku xi rhanga emahlweni hi 2-1. Leswi a swi tikomba leswaku leswi vatlangi va byeriweke swona hi nkarhi wo wisa swi va nyikile matimba, tanihileswi a va tlanga bolo ku navela na xipano lexi a va tlanga na xona tanihileswi a va lawula ntlango bya ncuva, loko va Eleven Stars va mbambambambela bolo onge va tlanga exinyamini.

Matlangelo ya Xikukwani Academy, ya endlile leswaku xi howisa golo ya vunharhu ku engetela xikoro xi va 3-1. Hambiswiritano, xipano xa Eleven Stars, xi arile ku tlhava tsolo ehansi, leswi endleke leswaku hi nkarhi lowu a wu dyiwile hi makondlo, xi kota ku howisa golo ya vumbirhi ku endla 3-2. Kambe leswi a swi nga ringanelanga tanihileswi n’watipepe a nga ba nanga ro hetelela, ntlango wu fika emakumu hi 3-2, ku hlula Xikukwani Academy.

Endzhaku ka ntlango, mukondleteri wa mphikizano tlhelo mudzaberi wa xipano xa Xikukwani Academy, Bongani Kenneth Mlungani, u khensile vaseketeri va ka Xikukwani. “Ä ndzi se tshama ndzi vona rivala leri ri tarile ku pfumaleka na vuphelo bya marha, naswona ndza khensa eka vaaki kuva va hi kombile nseketelo naswona mphikizano wu fambile kahle swinene,” ku vula Malungani.

Loko a vutisiwa hi sagwadi ra macheleni, Malungani u vurile leswaku xiphemu xin’wana xi ta tirhisiwa ku pfala tihakelo to lulamisela mphikizano, loko yin’wana yi ta ya eka vatlangi leswaku va ta hlohloteleka. “A hi mhaka ya mali, kambe i ku nyika nkateko eka vantshwa leswaku va kula na ku tivonakarisa,” u ya emahlweni.

Kuhlula loku, swi kombisa leswaku Xikukwani Academy hi xona xi chayaka xinari emugangeni, leswi ku nga hungu ra le rivaleni ra leswaku ku hlula xipano lexi ekaya a swi nge olovi eka xipano xin’wana na xin’wana lexi va nga ta phikizana na xona.