Majaha ya Endlela Matimu

Hi Mkateko Ndlovu

Majaha mambirhi yo huma emugangeni wa le Gumbani ehandlenyana ka doroba ra ka Malamulele ya endlile matimu hi ku tirhisa thekinoloji ku antswisa dyondzo. Majaha lawa i Shibambu Marvel na Malunghelo Mathonsi. Xitirhisiwa xa thekinoloji lexi va xi tumbuluxeke xi dyondzisa tidyondzo ta vana va xikolo kusuka ehansi.

Ku vuriwa leswaku xitirhisiwa lexi xi dyondzisa tidyondzo ta Tihlayo na Sayese kusuka eka giredi 8 ku fika eka giredi 12. Xikongomelonkulu xa kuva majaha lawa va endlile xitirhisiwa lexi i ku olovisa dyondzo eka machudeni lawa ya humaka ematikoxikaya hikuva kuhava switirhisiwa swa thekinoloji swo olovisa dyondzo.

Vito ra xitirhisiwa lexi xa epe i Nova, naswona a va nga ri na mpfuno wa macheleni kusuka eka swiyenge swa mfumo kambe va hlengeletile macheleni yo ringana R700 va xava khompyuta ya khale laha va nga tshama ehansi va tidyondzisa ku endla epe hi ku pfuniwa hi youtube.’’tanihileswi Machudeni ya humaka eka mindyangu ya swiyimo swo hambana-hambana, epe leyi ya mahala yi ta pfuna swinene leswaku un’wana na un’wana a kuma dyondzo hi ndlela yo olova naswona hi ndlela yo ringana’’ Shibambu Marvel wa hlamusela.

Majaha lawa ya kotile ku tiendlela epe ya vona leyi yi tirhisiwaka ngopfu naswona yi tisa mpfuno lowunkulu eka vadyondzi ni va vadyondzisi va le matikoxikaya. Va tlhela va kombisa leswaku hambileswi a swi nga olovi ku fikelela ku endla epe leyi kambe hi ku tinyiketela va swikotile ku humelerisa milorho ya vona erivaleni.

Eka swiyenge swa yena swa mabulo swa tick-tok na facebook, Shibambu Marvel u va a ri ka ri a dyondzisa tidyondzo ta Tihlayo na Sayese laha a kombisaka leswaku ku navela ka yena hi leswaku vadyondzi va kuma mbuyelo wa kahle eka tidyondzo ta Sayese na Tihlayo. U hlohlotela vadyondzi leswaku va n’wi landzela eka swiyenge swa mabulo leswaku va ta dyondza swotala.

Majaha lawa ya endlile na webisayiti yo pfuna machudeni ya ka giredi 12 leswaku loko va lava ku endla swikombela swa ku amukeriwa etiyunivhesithi va yi tirhisa xikan’we ni ku endla swikombelo swa tibasari.