Machudeni Ya Khomiwa

Hi Mkateko Ndlovu

Maphorisa ya xifundzheninkulu xa Eastern Cape va tiyisisa hi ku khomiwa ka machudeni ya Mune ekhamapasini ya Nelson Mandela Drive eyunivhesithi ya Walter Sisulu eMthatha. Mhangu leyi yi humelerile hi nkarhi lowu machudeni a va kombisa ku vilela hi ndlela ya madzolonga laha a va pfarile magondzo xikan’we no hisa mathayela emagondzweni. Maphorisa ya kombisa leswaku machudeni lawa ya ta hehliwa hi milandzu ya madzolonga ya vaaki, ku onha switirhisiwa na nhundzu ya mfumo.

Ku vilela ka machudeni swi sungurile endzhaku ka loko Khoto ya Majisitara wa Mthatha yi nyikile mufambisi wa vutshamo eka tindhawu to tshamela machudeni beyili ya R10 000 Manelisi Mampane, wanuna loyi a hehliwaka hi ku duvula n’wana wa xikolo hi nkarhi lowu machudeni a va kombisa ku vilela hi nhweti ya Dzivamusoko. Manelisi u langutanile na swihehlo swo dlaya na ku ringeta ku dlaya endzhaku ka rifu ra xichudeni xa 24 wa malembe hi vukhale hi nkarhi wo kombisa ku vilela.

Hambiswiritano, ku vile ni madzolonga exikarhi ka machudeni na maphorisa laha maphorisa a ya tirhisa swibalesa swa tiqulu ta rhaba kambe machudeni a ya tirhisa swibuluki swa petiroli, maribye ni mabodlela. Hi nkarhi lowu machudeni a ya ringeta ku vilela, maphorisa mambirhi ya vivisekile naswona enkarhini wa sweswi va kuma vutshunguri exibedlele. Muvulavuleri wa maphorisa Nobuntu Gantana u tiyisisile ku khomiwa ka machudeni ya Mune, no vaviseka ka maphorisa mambirhi hi nkarhi wo kombisa ku vilela.