Un’we a Gweviwa loko Vambirhi va Dlawa hi Vukhamba bya Swifuwo

Hi Themba Chauke

Muhlapfa a Gweviwa hi Mhaka Swoswo bya Mbuti

Khoto ya Majisitarata wa Groblersdal yi gwevile wanuna wa malembe ya 28, muhlapfa Leonard Chauke ku tshama ekhotsweni tin’hweti ta Ntsevu hi milandzu ya vukhamba bya swifuwo xikan’we na ku tlula milawu ya Vuhlapfa etindhawini ta le Marble Hall. Hi siku ra 28, Nyenyenyani 2025, mutirhi wa le purasini ra le Loskop N’walungu, u kumile leswaku timbuti timbirhi ti mirile milenge hikuva a nga tivoni exivaleni loko a valanga nimixo. Ku tlherile ku kumeka na masalela ya ngati endzeni ka Xivala, xikan’we na vumbhoni bya le rivaleni, lebyi byi katsaka na nthalo wa ngati xikan’we na mikondzo leswi a swi huma exivaleni.

Mutirhi loyi a nga na vuswikoti byo landzelerisa, u landzelerisile mikondzo leswi swi n’wi fikiseke epurasini ra muakelana. Loko a ta va a tivisile n’winyi wa purasi hi mhangu leyi, ku sunguriwile musecho eka byetlelo bya vatirhi hi ku pfuniwa hi varindzi va le purasini. Hi nkarhi wa musecho, ku kumekile nyama ya mbuti endzeni ka bakiti laha ku hlamberiwaka kona, laha muehleketeleriwa a tshamaka kona. Mumangari u kotile ku tiyisisa leswaku nyama leyi i ya timbuti leti nyamalaleke hi ku tirhisa mfungho wa timbuti leti yiviweke.

Maphorisa ya vitaniwile xikan’we-kan’we, naswona loko Chauke a vutisiwa hi ta nyama na swoswo bya mbuti u tsandzekile ku nyika vuxokoxoko lebyi enetisaka bya leswaku nyama ya swifuwo swo yiviwa u yi kuma kiwhi. Wanuna loyi u ve a khomiwa ku ya pfaleriwa exitokisini xa le Xitichini xa Maphorisa xa Marble Hall.

Wanuna u hehliwile hi nandzu wa ku kumeka na nyama yo yiviwa xikan’we na ku tlula nawu wa Vuhlapfa. U sungurile ku tenga hi n’hweti ya Nyenyankulu 2025 laha a famba tikhoto eka tin’hweti leti a ti landzela. Kasi hi siku ra 02 Khotavuxika 2025, Khoto ya majisitara wa Groblersdal, yi vonile Chauke Nandzu eka swihehlo hinkwaswo. Swihehlo leswi swi patsiwile endhawini yin’we naswona u nyikiwile xigwevo xa tin’hweti ta Ntsevu. Khoto yi tlherile yi lerisa leswaku Chauke a tlheriseriwa eka rikwavo eZimbabwe,

Vavanuna va Dlawela Vukhamba bya Tihomu

Khomixinara wa maphorisa ya xifundzhankulu xa Limpopo, Leutanant Jenerali Thembi Hadebe, u sorile swinene ku dlawa hi ndlela ya tihanyi ka vavanuna vambirhi endzhaku ka loko vaaki va tekile nawu va wu veka emavokweni ya vona eTshimbupfhe Tshilindi etindhawini ta Vuwani, hi siku ra 02 Khotavuxika 2025.

Maphorisa ya vitaniwile eka mhangu leyi yo chavisa endzhaku ka ku kuma swiviko swa ku mbeyeteriwa ka vanhu epurasini ra le ndhawini liya. Loko maphorisa ya fika, ya kumile vavanuna vambirhi va vantima, va malembe ya 41 na 49, lava a va biwile swinene, va hluvuriwa na swiambalo xikan’we na ku bohiwa hi titambhu va ri na timbhanga to chavisa.

Vaswilamulelamhangu va tiyisisile leswaku un’we wa vatwisiwakuvava u hundzile emisaveni, loko wa vumbirhi a tsutsumiseriwile exibedlele laha a nga hundza emisaveni loko a fika. Vulavisisi byi kombisa leswaku vavanuna lava a va hehliwa hi vukhamba bya swifuwo loko va ta hlaseriwa hi vaaki naswona ku kumekile homu yin’we yi file na tihomu timbirhi kusuhi na vaehleketeleriwa. Maphorisa ya vula leswaku ya sola swinene ku teka nawu va wu veka emavokweni. Milandzu yimbirhi yo dlaya yi pfuriwile naswona maphorisa ya hlotana na vadlayi. Kasi ku komberiwa loyi a nga na vuxokoxoko ku tihlanganisa na sejeni Ndidzulafhi Mulaudzi eka 076 939 9199 kumbe 08600 10111 kumbe maphorisa ya le kusuhi.