Mutshamaxitulu a Sola Vugangu bya Vadyondzisi ni Vadyondzi

Hi Mkateko Ndlovu

Hi siku ra ti 05 Khotavuxika 2025, tihofisi tinharhu ta xifundza eka ndzawulo ya dyondzo xikan’we ni vadyondzisi kusuka eka swikolo swo hambana-hambana a va hlanganile eholweni ya vaaki ya ka Malamulele ku khoma nhlengeletano ya malembe manharhu ya rhavi ra Punda ra nhlangano wo yimela vadyondzisi wa SADTU.

Xikongomelonkulu xa nhlengeletano a ku ri ku hlawula vurhangeri lebyi byi nga ta fambisa na ku yimela vadyondzisi ehansi ka nhlangano wa SADTU eka rhavi leri. A ku ri nhlengeletano ya matimba swinene hikuva vadyondzisi votala a va sukerile mitirho ya vona ku ya dyondza hi matirhelo ya le swikolweni xikan’we no hlawula vurhangeri lebyi byi nga ta va yimela.

Hi nkarhi wa nhlengetano, vadyondzisi va hlawurile vanhu lava va nga ta va rhangela na ku va yimela. Tatana K.R Maluleke, Mutshamaxitulu loyi a nga hlawuriwa u yimile a nyika marito yo tshinya eka vadyondzisi. Maluleke u  hlohloterile vadyondzisi leswaku va fanele ku tinyiketela eka mitirho hinkwayo leyi va yi endlaka.

Mutshamaxitulu u yile emahlweni a sola vuxaka bya timhaka ta vugangu exikarhi ka vadyondzisi ni vana va xikolo laha a nga kombisa hi khombo ra vugangu lebyi. U tsundzuxile vadyondzisi hi mikarhi leyi ya swikambelo leswaku vadyondzisi va fanela ku lulamisa maphepha ya swikambelo swa vana va xikolo hi nkarhi xikan’we na ku kombisa hi
khombo ro salela endzhaku eka ku lulamisa mitirho ya machudeni.

Meyara wa masipala wa Collins Chabane tatana Shadrack Maluleke a ri xiphemu xa nhlengeletano leyi, laha a nga vona swi fanerile ku seketela vadyondzisi eka ntirho wa vona. Meyara u andlarile xivono xa masipala eka timhaka ta dyondzo, nkoka wa migingiriko ya dyondzo ku katsa na migingiriko ya nkoka ya tipholisi, ku averiwa ka switirhisiwa na ku tirhisana na SADTU.