JAHA RI KOMBISA VUSWIKOTI EKA KHIRIKHETE

Hi Themba Chauke

Jaha ra malembe ya 18, Ntshuxeko Sibatha kusuka elokixini ra le Giyani a ti-F, u kombisa vuswikoti byo kala swinene lebyi byi siyeke vadzaberi va hlamarile. Leswi swi endlaka leswaku a hambana na titangha ta yena i vuswikoti byo hoxa bolo. Kasi vahoxi va bolo va malembe ya le hansi ka 19 va tikeriwa hi ku hoxa bolo hi rivilo. Ntshuxeko u kombisa ku hundzisa leswi swi languteriweke eka yena hi ndlela leyi a hoxaka hi yona bolo na rivilo.

Kuya hi mudzaberi, Dingani Mathonsi kusuka eka Giyani Cricket Hub, u vula leswaku vuswikoti bya Ntshuxeko byi kumekile lembe leri hundzeke loko a hoxa bolo hi rivilo ra 128km/h, rivilo leri ku vuriwaka leswaku ri hundza hi kwalomu ka 10km/h eka rivilo ra titangha takwe.

 “Leswi u swi kombisile hi nkarhi lowu a ri na malembye ya 17, naswona a hi switivi leswaku, loko o ringetiwa enkarhini wa sweswi, a nga hoxa hi rivilo ra njhani lembe leri,” u ya emahlweni. Kuya hi yena, Ntshuxeko hi un’wana wa vatlangi vambirhi eLimpopo lava va ha ku hlawuriwaka eka xipano xa SA Hub, lexi xi tlangeke eka thononamete leyi a yikhomeriwile ePitori hi siku ra ti 16 ku fika ti 19 Nhlangula 2025, laha a ku phikizana swikolo swo hundza 45 etikweni.

Thonamete leyi yi vuriwa kuva yi ri ndlela yo lulamisela mitlangu ya misava leyi ku vuriwaka leswaku yi ta va kona lembe leritaka hi Sunguti. Ku lo hlawuriwa vatlangi vambirhi ntsena vo huma eLimpopo eka xipano lexi. “Un’wana mutlangi la hlawuriweke u huma ePalaborwa, ndzi lo rivala vito rakwe. U hlawuriwile na Ntshuxeko, hi vona lavambirhi va hlawuriweke ku yimela xifundzhankulu xa Limpopo eka ntirho lowu,” ku hlamusela mudzaberi.

“Enkarhini wa sweswi a hi se kuma mbuyelo wa swikambelwana swa vona, kambe loko va tirhile kahle, va ta hoxiwa eka xipano lexi xi nga ta tlanga hi Sunguti na swipano swa misava,” u ya emahlweni,

Loko a vutisiwa hi nkateko wa ku hlawuriwa ku ya nghena eka xipano hi SungutI, Ntshuxeko u vurile leswaku u lume meno, a tshembha leswaku a nga ha hlawuriwa eka vatlangi va 11 lava va nga ta yimela xipano. Ehandle ka matirhelo ya yena eka ntirho lowu na ku tlakuka ka ndhuma yakwe Ntshuxeko wa ha titsongahata na ku kombisa ntikelo wa mphikizano lowu a langutanaka na wona.

“Hambiloko u tlanga kahle, a wu nge hlahluvi ku katsiwa ka wena eka xipano lexi mutlangi un’wana na un’wana a nga na talenta etikweni ra hina loyi a lwelaka ku kuma xiyimo lexi xi fanaka,” wa hlamusela.

U yile emahlweni a vula leswaku leswi a faneleke ku langutana na swona i ku yisa emahlweni matlangelo ya yena na ku ringanela ka yena loko a ha yimerile xitiviso xo hetelela. “Masiku hinkwawo ndzi endla vutiolori hi matimba leswaku ndzi ta tshama ndzi lulamerile ku tlanga, na loko ndzo va na nkateko, ndzi tshembha leswaku ndzi ta hlawuriwa,” wa hlamusela hi ku titshembha a ri na n’wayitelo.

Kasi mana wakwe loyi a n’wi seketelaka, Gladys Sibatha, u hlamusela jaha rakwe tanihi n’wana loyi a tikhomeke kahle xikan’we na ku tinyiketela eka ntlango wa khirikhete naswona u ta fikelela milorho ya yena. “I n’wana loyi a nga tikhoma kahle a nga hi pandzisi nhloko laha kaya, naswona ndza tshembha leswaku hambi a nga koti ku humelela eka nkarhi lowu, vumundzuku bya yena eka ntlango wa khirikhete bya vangama,” wa hlamusela a khensa na vadzaberi lava va letelaka n’wana wakwe kahle.