MUDLAYI WA MUHLEKISANI A GWEVIWA 25 WA MALEMB

Hi Themba Chauke

Wanuna wa malembe ya 25 loyi a ri mahungwini emasunguleni ya lembe leri etindhawini ta Giyani endzhaku ko dlaya muhlekisani wa yena enhoveni, u gweviwile 25 wa malembe ku ya tshama ekhotsweni hi Khoto ya le Henhla ya Thohoyandou.

Muhehliwa, Tlhandluko Gift Chauke, wo huma emugangeni wa ka Gawula, u dlayile muhlekisani wakwe wa malembe ya 20, Miranda Chauke, endzhaku ko n’wi hehla hi vugangu. Vumbhoni lebyi kombisiweke ekhoto, byi kombisa leswaku Tlhandluko u rhambile munghana wakwe Renaissance Kulani Chauke, ku ta n’wi pfuna eka leswi a swi hlamusela hi ku ‘xupula’ Miranda, loyi a hundzeke emisaveni endzhaku ka nkarhi hi siku ra 10 Sunguti 2025.

Ku vuriwa leswaku lavambirhi va tekile Miranda ekaya rakwe, laha va nga n’wi ba va nga se n’wi kokakoka va famba na yena enhoveni ya le kusuhi. Loko va ri kwale nhoveni, va yi le emahlweni va n’wi bukutela. Va hetelerile hi ku n’wi tlimba ku kondza a lova kutani va baleka va siya ntsumbu wakwe kwale nhoveni.

Hi siku leri landzelaka ra ti 11 Sunguti 2025, Tlhandluko u tiheleketile exitichini xa maphorisa ya le kusuhi laha a nga pfumela leswaku u dlayile muhlekisani wakwe. U tivisile maphorisa leswaku ntsumbu wa muhlekisani wakwe wa ha ri enhoveni, kutani maphorisa ya famba na yena laha a nga fika a va komba ntsumbu a tlhela a khomiwa xikan’we-kan’we.

Vulavisisi bya nandzu byi nyikiwile Constable Nhlalala Shilenge, loyi a sunguleke ku lavisisa nandzu, Ntirho wakwe wu endlile leswaku ku khomiwa muehleketeleriwa wa vumbirhi, Kulani Chauke, endzhaku ka masikunyana nandzu wu pfuriwile.

Hinkwavo va tshamile ekhotsweni lembe hinkwaro loko nandzu wu ri karhi wu tengiwa. Khoto yi va tsonile beyili hikokwalaho ka nkoka wa nandzu lowu na maendlelo ya tihanyi yo dlaya wanhwana. Loko nandzu wu ya emahlweni, Tlhandluko u tekile xiboho xo pfumela nandzu wo dlaya Miranda.

Kwalaho, khoto yi n’wi gwevile 25 wa malembe yo tshama ekhotsweni, leswi ku nga goza ra nkoka ro tisa vuvulami eka vandyangu wa mutwisiwakuvava. Loko ku ri Kulani, wa ha ya emahlweni a vula leswaku a nga tivoni nandzu. Nandzu wa Kulani wu hundziseriwile emahlweni ku ya eka 6 Nyenyankulu 2026, laha a nga ta sungula ku tenga, na swona u languteriwile ku hlamula swihehlo hinkwaswo leswi a hehliwaka hi swona.