WANUNA A DYIWA HI NGWENY

Hi Pilot Manganyi

Muganga waka Mafenya eNtlhaveni Block D, ehandlenyana ka doroba ra ka Malamulele, wu khomiwile hi gome na ku kanakana. Leswi swi ta endzhaku ka ku nyamalala ka muaki wa vona loyi va pfumelaka leswaku a ngava a dyiwile hi mati, kumbe xin’wana xa xihadyana xa le ndzeni ka mati emahelweni ya n’hweti ya Nyenyenyani.

Wanuna loyi a tivekaka hi vito ra Sticks u hetelerile ku voniwa a ri nkarhi lowu a rhiya tihlampfi edan’wini ra ka Makuleke leri fikaka ni le mimitini ya muganga wa ka Mafenya. Vaaki va vonile xikanyakanya xi pakiwile etlhelo ka damu na bakiti hi le tlhelo ku ringana nkarhi wo leha.  Leswi hi swona swi nga endla leswaku vaaki va lemuka leswaku ingaku swin’wana a swi tshamisekanga kahle.

Vaaki va chavile laha va nga ehleketelela leswaku a nga va a dyiwile hi mati, laha van’wana va nga hleketelela leswaku a nga va a dyiwile hi ngwenya tanihileswi damu ri nga tala hi swihari swo fana na tingwenya na timpfuvu. Sticks i munhu loyi ku nga khale a rhiya tihlampfi leswi swi nga endla leswaku va nga tshembhi leswaku a nga va a dyiwile hi ngwenya ku kondza ku fika vaswilamulelamhangu.

Maphorisa ya Afrika-Dzonga na vahlamberi va le matini va nghenile va sungula ku hlotana na Sticks endzhaku ka loko va lumiwile ndleve hi mhangu leyi. Vahlamberi va hlotanile na Sticks ku ringana masiku manharhu, kambe a ku vanga na nhlanga yo beleka ngati. Vulavisisi a byi kumanga ntsumbu kumbe masalelwa ya Sticks ehandle ka ntamu wa vona na ku tinyiketela.

Vahlamberi va boxile leswaku ntsumbu wa Sticks a wu le ku kumekeni na swona a ka ha ri na lexi va nga ta xiendla. Vaaki va kombisile ku hlundzuka no tikisela vahlamberi hi ku va byela leswaku va nga fambi va nga kumanga ntsumbu wa Sticks. Ehandle ka ku va vaakatiko va kombisile ku vilela, vahlamberi va yimile hi marito ya vona.

Vaaki va humile mano va twanana leswaku va hlenga ntsengo wa mali yo ringana ntlhanu wa tipondho (R10) hi muti. Makungu ya ku hlengiwa ka mali leyi a ku ri ku endlela leswaku va kota ku huma mungoma va ta kota ku kuma ntiyiso hi mayelana na malahlekelo ya Sticks.

“Tanihiloko vahlamberi na maphorisa va tsandzekile ku kuma ntsumbu wa Sticks, hi hlengile ntlhanu wa tipondho (R10) hi nhloko leswaku ku ta humiwa mungoma. N’anga yi bile tihlolo yi boxa leswaku masalelwa ya Sticks, ya ta kumeka hiku famba ka masiku”, ku boxa Jane Shirinda tanihi muaki wa le ka Mafenya.

Ku humiwa ka mungoma swi nyikile ntshembho wa ku kumeka ka ntsumbu wa Sticks. Vaaki va rindzerile hi mahlongati ku kumeka ka masalelwa ya Sticks leswaku va ta lahla. Vaaki va tsundzuxiwa leswaku va xiyaxiya lomu va fambaka kona na swona va nga tlangeli edan’wini tanihileswi ku nga hlayisekangiki.