GEZI RI VUYA ESASELAMANI

GEZI RI VUYA ESASELAMANI

Hi Pilot Manganyi

Endzhaku ka tin’hweti ta ku hlundzuka ka vaaki, ku kavanyetiwa ka migingiriko na swivutiso swo pfumala tihlamulo, vaaki va le hansi ka miganga ya Saselamani va kotile ku hefemula. Leswi swi ta endzhaku ka loko gezi ri nga ha fambi, tanihileswi a ri famba na xivangelo xi nga tiveki leswaku i yini.

Ku ringana nkarhi wo leha, vaaki va miganga ya le Saselamani a va tsemeriwa gezi, ngopfungopfu exikarhi ka awara ya Nkombo na Nkaye namadyambu, loko vaaki va tindhawu tin’wana va ri na gezi. Ku famba ka gezi swi siyile vaaki va hlundzukile na swivutiso swo pfumala tihlamulo, laha vaaki a va vutisa leswaku hikokwalaho ka yini miganga ya vona yi tsemeriwa gezi ehenhla ka miganga leyo tala.

Ku famba ka gezi swi kavanyetile migingiriko ya vaaki ya siku na siku, vana va xikolo a va tsandzeka ku tsala mitirho ya xikolo na vusiku, mindyangu yi hundziwa hi switori leswi va swi rhandzaka, mabindzu ya lahlekeriwa hi mbuyelo na mimiti yi sala exinyamini va nga swi ehleketelelanga. Vaaki va ringetile ku kombisa ku tshikeleleka ka vona, laha va nga kombisa leswaku maendlelo lawa ya kavanyeta vutomi bya siku na siku.

Vaaki va kombisa leswaku ku na ku cinca swinene hi tlhelo ra mphakelo wa gezi hikuva ri nga ha fambi.  “Hi tsakile hikuva vutomi byi vuyela ematshan’wini, vana va hina sweswi va ta hlaya hi kurhula, hi sweka nkarhi wihi na wihi na swona a ha ha valavali hi xinyami xa xitshikeyani,” ku boxa Rhulani Makhubele.

Mabindzu ya le matikoxikaya na wona ya kota ku tirha hi ku hetiseka. Leswi swi pfuna van’wamabindzu ku va va pfala hi nkarhi lowu faneleke, va tlhela va nga ha lahlekeriwi hi mbuyelo. Vaaki va kota ku famba na vusiku, leswi swi pfuna mabindzu ku va ya ya emahlweni ku nga ri na swipimelo. Swixavisiwa swa vona na swona a swa ha vaviseki hikokwalaho ka ku famba ka gezi. Vaaki na van’wamabindzu va amukela ku cinca loku nga kona hi tlhelo ra mphakelo wa gezi.

Hambiswiritano, a ku va nga na n’wangulo hi tlhelo ra xivangelo xa ku famba ka gezi kumbe xintshuxo, vaaki vo khensa ntsena loko va kuma mphakelo wo ringanela wa gezi. Vaaki va tshembha leswaku gezi ri ta va ri vuyerile makumu na swona va kombela vurhangeri ku tiyisisa eka vukorhokeri lebyi. Ku vuya ka gezi swi vuyerisile vutomi bya vaaki va le Saselamani ematshan’wini.