SELWANE WHITE VULTURES YI AKA VUXAKA NA AMATUCKS

Hi Themba Chauke

N’wini wa xipano xa bolo ya milenge xa Selwane White Vultures Norman Malatji u vule leswaku vuxaka lebyintshwa na xipano xa Yunivesiti ya Pitori kumbe AmaTucks lebyi endleriweke ku pfula tinyangwa eka vatlangi va le kaya ku fikelela nseketelo wa swa tidyondzo na mikateko yo tlanga bolo ya xiphurofexini xikan’we na ku hlayisa vuxaka bya xipano na vaaki. AmaTucks a yi ri eka Selwane tanihi xiphemu xo avelana vuswikoti na Selwane White Vultures. Malatji u tiyisisile leswaku swipano leswimbirhi swi twananile ku tirhisana eka ku hlota na ku hluvukisa vatlangi tanihi xiphemu xa vuxaka lebyi.

“Hi va rhambile ku hi endzela leswaku hi yisa emahlweni migingiriko leyi,” ku vula Malatji. “Hi sungurile hi ku endzela xikolo ku ya burisana na vadyondzi na ku va hlohletela. A hi va nyika vuleteri byo yisa emahlweni tidyondzo na tindlela to endla swikombelo eka AmaTucks, ku nghenela eka xikolo lexi, xikan’we na ku tikumela nseketelo wa swa timali eka tidyondzo,” u ya emahlweni.

U vule leswaku tindlela ta nhluvukiso eka AmaTucks ti fambelana na Yunivhesiti ya Pitori, hi ku nyika vatlangi va vuswikoti nkateko wo yisa emahlweni tidyondzo loko hi hala tlhelo va yisa emahlweni migingiriko ya ntlangu wa bolo ya milenge, laha a vuleke leswaku xipano a xi va endzerile ku ta valanga vatlangi etindhawini hinkwato ta xifundza. “A va nga endzelanga xipano xa hina ntsena, un’wana na un’wana mutlangi wa khale loyi va n’wi vonaka va ta n’wi teka,” ku vula yena. Malatji u tshikelerile leswaku White Vultures yi na swo hlaya ehandle ka ntlangu wa bolo ya milenge, laha a hlamuselaka xipano tanihi pfhumba ra vaaki leri langutaneke na ku hluvukisa vantshwa lava nga laviki ku va sukela. “Eka mina, leswi i ku nyikela eka vaaki. Hi teka vantshwa lava nga na vuswikoti lava nga tekeriwiki enhlokweni eka xifundzakulu hi va nyika nkateko wo vonakarisa vuswikoti bya vona.”

Hambileswi va nga na ku navela ku tlakuka ku ya emaninginingini, Malatji u swi veka erivalen leswaku xipano xi ta tshama xi tinamarhetile na vaseketeri va le kaya, laha a vuleke leswaku hambi xipano xo tlakusiwa ku ya eka Ligi ya le Henhla kusuka eka Motsepe ka ha ta tirhisiwa vito ra xipano. “Leyi i phurojeke ya vaaki, leyi ndzi lavaka leswaku yi tshama kwala emugangeni wa ka Selwane, hambi ho tlakusiwa,” wa tiyisisa.

Loko swi ta eka mitlangu, Malatji u amukerile leswaku nguva leyi a yi tika swinene eka xipano, kambe a kombisa leswaku ku navela ka xipano ka nkarhi wa sweswi i ku tlakusiwa ku ya eka ligi ya le henhla, leswi a vulaka leswaku swi ta vonakarisa xipano etikweni. Loko a vutisiwa hi ku xava swipano leswi nga le henhla leswaku xipano xi ta kota ku fikelela eka PSL hi ku olova, u kombisile leswaku xipano xa yena xi tiyimiserile ku tirha hi matimba ku kota ku fika ehenhla hi xoxe a vula leswaku swi fanele ku tirheliwa.