HOSI A NYIKA TUT MISAVA

Hi Themba Chauke

Yindlu ya vuhosi bya mfumo xivongo xa ka Mhinga, byi bumabumerile ku nyikela 20 wa tihekitara ta misava eka Yunivhesiti ya Thekinoloji ya Tshwane (TUT) ku kota ku endla rhavi ra Yunivhesiti kusuhi na Gede ya ntanga wa swihari ya Punda Maria, leyi nga ta tirha tanihi ku engetela eka rhavi ra TUT eGiyani.

“Tanihileswi mi swi tivaka leswaku TUT yi pfurile rhavi eGiyani, na swona ndzi un’wana wa swirho eka komiti leyi hoxeke xandla eka nhluvukiso lowu. Hina tanihi yindlu ya Vuhosi bya ka Mhinga, hi bumabumerile ku nyikela 20 wa tihekitara ta misava eka TUT, kusuhi na gede ya Punda Maria ku endla rhavi ra yunivhesiti ya TUT ku engetela migingiriko leyi nga le Giyani,” ku vula Hosi Mhinga, laha a vuleke leswaku xibumabumelo lexi xi yimerile ku pasisiwa hi yunivhesiti. U tlhele a vula leswaku ndhawu leyi yi taleriwile hi ntalo wa ntumbuluko leswi nga pfunaka swinene eka swichudeni leswi endlaka tidyondzo ta ntalo wa ntumbuluko, U kombisile nkoka wa ntanga wa swihari wa Kruger ku tirhisana na TUT, ngopfungopfu loko swi ta eka mhaka ya ntalo wa ntumbuko.

Hosi Mhinga u vule leswaku xikongomelokulu xa mhaka leyi i ku antswisa ku fikelela dyondzo eka vadyondzi va le kaya lava langutaneke na mitlhontlho yo hlaya. “Vo tala va boheka ku famba mipfhuka yo leha ku ya etiyunivhesiti ta le kule. Loko hi tisa yunivhesiti kusuhi na vaaki, hi tshembha leswaku hi ta hunguta swirhalanganyi swa swa timali na swin’wana swilaveko leswaku vantshwa va le kaya va kuma mikateko yo hlaya ku yisa tidyondzo ta vona emahlweni.”

Swibumabumelo leswi swi tekiwa tanihi ndlela ya kahle laha muvulavuleri wa ntanga wa swihari Ray Thakuli loyi a vuleke leswaku swi ta pfuna swinene na le ka swichudeni leswi akelaneke na ntanga, a tlhela a kombisa leswaku ntanga wa swihari wa Kruger wu na mali yo hlaya yo seketela vadyondzi ku yisa tidyondzo emahlweni eka yunivhesiti leyi.