VATLANGI VA LE GIYANI VA HLAWURIWA

Hi Themba Chauke

Khume wa vatlangi va malembe ya le hansi ka 13; 13 wa vatlangi va malembe ya le hansi ka 15; na Nkaye wa vatlangi va malembe ya le hansi ka 19, va hlawuriwile ku ya tlangela xipano xa vuleteri bya mitlangu xa Benny’s Care Sports Academy (BCSA) ePitori endzhaku ka mitlangu yo ringetela leyi a yi khomeriwile emugangeni wa ka N’wamankena ehandle ka doroba ra Giyani hi Mugqivela.

BCSA hi yin’wana ya tindhawu ta vuleteri bya mitlangu leyi rhangaka emahlweni etikweni. Yi hlurile eka mphikizano wa thonamete ya Motsepe ya swikolo lembe leri hundzeke eka vatlangi va malembe ya le hansi ka 16 laha yi tibukuteleke ntsengo wa R3 wa timiliyoni.

Kuya hi Gezani Mashaba, un’wana wa vadzaberi etindhawini ta vaaki, loyi a tlheleke a kondletela thonamete leyi, u vule leswaku BCSA yi le ku hlengeleteni ka vatlangi ku kota ku sirhelela xidlodlo endzhaku ka ku hlula swipano hinkwaswo swa vuleteri bya mitlangu etikweni, leswi katsaka leswi sukaka eka PSL swo fana na Mamelodi Sundowns, Orlando Pirates na Kaizer Chiefs.

 “Xipano lexi xi tlhele xi tlanga na le ka Khapu ya Misava ya Danone leyi a yi khomeriwile eFrance lembe leri hundzeke ya vatlangi va malembe ya le hansi ka 12, kwalaho mi nga swi vona leswaku laha hi kona vatlangi lavatsongo va kumaka mikateko yo voniwa na ku yisa emahlweni vumundzuku bya vona bya ntlango wa bolo,” ku hlamusela Mashaba.

Xipano lexi xi tumbuluxiwile hi lembe ra 2004, na swona xi vuriwa ku va xi humelerisile vatlangi vo fana na Wiseman Madlaya Maluleke, mutlangi loyi se a nga mudzaberi wa xipano xa Phalaborwa United. Xin’wana xikombiso i Khuliso Mudau, mutlangi wa xipano xa Mamelodi Sundowns loyi a yimerile xipano xa rixaka eka mitlangu ya khapu ya misava eMexico na le USA eka lembe leri ra 2026, laha xipano xa rixaka xi humeke eka rhengu ra swipano swa 32 hi ku hluriwa hi golo yin’we eka tandza hi Canada hi siku ra 28 Khotavuxika 2026.

Loko a vutisiwa leswaku ku ta humelela yini hi tidyondzo ta vatlangi lava hlawuriweke, Mashaba u vule leswaku ehandle ka ku hluvukisa ntlango wa bolo ya milenge, BCSA yi tlhela yi nyika vuleteri bya tidyondzo kusuka eka Giredi R ku fika eka Giredi 12.

“I xikolo hi xoxe, leswi endlaka leswaku tidyondzo ta vatlangi ti nga kavanyeteki. Swin’wana na swin’wana leswi fambelanaka na tidyondzo ta vona kusukela eka matirhelo ya vona eswikolweni swi ta hundziseriwa exikolweni lexi leswaku va yisa tidyondzo ta vona emahlweni,” ku vula Mashaba, laha a nga tlhela a kombisa leswaku leswi a hi swintshwa hikuva swi tshame swi endliwa swi humelela enkarhini lowu hundzeka.

Mashaba u hlohletela vatswari ku seketela vana va vona na ku va pfuna ku landzelela milorho ya vona ku nga ri ku va khomeleta hi ku va bohelela ku landzelela leswi vatswari va ehleketeka leswaku hi swona swo antswa eka vona, leswi endlaka leswaku vana va teka tindlela ta mitirho yo ka yi nga ri kahle.

“Sweswi bolo ya milenge i ndlela ya mitirho, a ko va ntlango ntsena. Vumundzuku bya van’wana a byi ti ntsena hi tidyondzo ta le xikolweni; van’wana va ta humelela hi mitlangu. Hikwalaho loko mi ringeta ku va fambisa hi ndlela leyi mi ehleketaka leswaku yi kahle eka vona, mi kandziyela vumundzuku bya vona,” wa gimeta.