PURASI RA NGALAVA YA NANTSWO

Hi Themba Chauke

Loko Deon Mthombeni, wa le ka Homu 14B, eGiyani a tirhisa mali yakwe ku xava thokazi yin’we ya nyimpfu hi mali ya NSFAS hi lembe ra 2017, a ku nga ri na munhu loyi a ehleketa leswaku leswi ku ta va masungulo ya vurimi bya nhlengelo.

Namuntlha wanuna loyi wa malembe ya 31, u thwaserile tidyondzo ta vufambisi eKholichi ya Mashamba eElim hi lembe ra 2020, u na purasi ra ndyangu leri a ri tirhisaka na makwavo wakwe wa xinuna Vutivi. Lavambirhi va rima miroho va xavisela vaaki na ku rhumela eka timakete letikulu etikweni, xikan’we na ku va na tinyimpfu leti masungulo ya kona ku nga nyimpfu yin’we ya thokazi leyi Deon a yi xaveke a ha ri xichudeni.

Deon u tekile nsimu ya ka vona loko a ha ri xichudeni, na swona endzhaku ka ku

vuya na nyimpfu ekaya leswaku yi ta hlangana na nyimpfu ya makhelwani, u tirhisile mali yo xavisa swinyimpfana ku engetela ntlhambi wakwe wa swifuwo hi switsongotsongo.

Hi nkarhi lowu a nga heta xikolo na ku sungula ku tirha nkarhi hinkwawo epurasini kusukela hi lembe ra 2020, tinyimpfu takwe ti tlakukile leswi endleke leswaku a xava timbuti, tinguluve na tihomu timbirhi, leswi na swona swi ndlandlamukeke. Hambiswiritano, makwavo wakwe u fuwa tinguluve hi xikongomelo xo dya ekaya, loko swin’wana swifuwo swi xavisiwa.

Migingiriko ya vurimi yi tlakukile ku hundza eka swifuwo. Deon na Vutivi sweswi va byala na khavichi xikan’we na viriviri ra rihlaza, leswi va swi xaviselaka vaaki na timakete etikweni hinkwaro, kambe va tlhomile tihlo eka nkateko lowukulu. Vamakwavo va na ku navela ku byala maviriviri ya mihlovohlovo, leswi va vulaka leswaku swi ta tisa bindzu ra kahle tanihileswi ku nga ri ki na lava swi byalaka eGiyani.

Hambiswiritano, va khomeletiwa hi ku pfumala switirhisiwa, ngopfungopfu ritavala, leri nga na nkoka eka ku byala viriviri ra muxaka lowu tanihileswi ri nga laviki dyambu ro hlaya hi ximumu.

Leswi endlaka leswaku matirhelo ya vamakwavo va ka Mthombeni ma va lama hlawulekeke, hi leswaku swilo epurasini ra vona swa tirhisana. Va tirhisa manyoro ya swifuwo ku nonisa misava ya swimilana, masalelwa ya matsavu ya nyikiwa tinguluve, loko va lava ku xava swin’wana epurasini ra vona va xavisa xifuwo ku xava leswi va swi lavaka.

Hungu ra vamakwavo va ka Mthombeni i xikombiso xa kahle xa leswaku ku tiyisela na ku tirha hi matimba swi tisa ku humelela.