DA YI VILERISIWA HI NKULULO EGIYANI

Hi Themba Chauke

Vandla ra Democratic Alliance (DA) ri xungeta ku mangalela masipala wa xifundzantsongo xa Mopani na masipala wa Giyani eka Xiyenge xa Vukamberi bya Vufambisi bya Mbango, lexi tivekaka tanihi Green Scorpions, hikwalaho ka nkululo lowu tshamelaka ro halaka elokixini ra ti-F eGiyani.

Mukhanselara wa DA Rodney Tito Mavundza, u vule leswaku nkululo wu na tin’hweti tantlhanu wu ri ku pfuteni wu nghena etindhawini ta vatshami, leswi a vulaka leswaku “swi hundzula tindhawu ta vaaki ti va leti nga tshamisekangiki leswaku ti tshama vanhu na nxungeto wa rihanyo.”

Mavundza u vule leswaku va na makungu yo mangala xivilelo xa ximfumo eka Green Scorpions, laha a hehlaka timasipala letimbirhi hi ku tsandzeka ku lunghisa vumaki bya nkululo lebyi onhakeke hambileswi va tivaka swiphiqo leswi.

Mavundza u vule leswaku vaaki va boheka ku tiyisela risema ro nuhwa xikan’we na nxungeto lowu fambelanaka na nkululo wumbisi, a tlhela a vula leswaku ku halaka ka nkululo swi kumbha vutomi bya vaaki.

Kuya hi Mavundza, yindlu yin’we yi khumbheka swinene hikowalaho ka nkululo lowu halakaka. U hehla leswaku vatirhi va timasipala ta Mopani na Giyani va yile kuya kambela endhawini liya, kambe va tsandzeka ku ta na xintshuxo xa nkarhi wo leha.

“Ehandle ko endzela ndhawu liya hi vatirhi va ka masipala, kuhava lexi endliwaka. Ku ka ku nga lunghisiwi hi mikarhi hinkwayo eka vumaki bya nkululo lebyi hlakaleke hi swona leswi endlaka leswaku ku va na ku halaka ko fana na loku, leswi swi nga na xiave xo biha eka vatshami lava hakelaka xibalo,” ku vula yena.

Loko a angula swihehlo, muvulavuleri wa masipala wa Giyani Steve Mavunda u vule leswaku xiphiqo lexi xi kona hikwalaho ka phayiphi leyikulu ya nkululo ya khale leyi kanganyisiweke leswi endlaka leswaku yi tsandzeka ku amukela mpimo wa nkululo lowu khulukaka eka yona.

U vule leswaku leswi swi endlile leswaku masipala wa xifundzantsongo xa Mopani wu thola mukondiraka ku hoxa phayiphi yin’wana ya nkululo. “Phayiphi leyintshwa ya nkululo yi endliwile, na swona ndzi tivisiwile leswaku ku hoxiwa ka tiphayiphi swi gimetiwile. Ntirho lowu saleke, lowu ku nga riki ntirho wa xifundzantsongo i ku endliwa ka swipfalo swa magoji,” ku vula Mavunda.

U vule leswaku xipano xa xithekiniki xa masipala wa Giyani, xi le ku tirhaneni na ntirho lowu saleke wo hoxa swipfalo swa magoji, na swona swi ta fika emakumu ku nga ri khale. U tlhele a vula leswaku vatirhi va ka masipala va tlherile va pfula na tiphayiphi ta nkululo leti a ti pfalekile, na swona nkululo se wu famba kahle.

“Loko misava yi ri ku omeni, swi ta kombisa leswaku ku pfaleka ka tiphayiphi se swi lulamisiwile, hikuva a ku nge vi na ku pfuta kun’wana.” Ku gimeta Mavunda loyi a vuleke leswaku tiphayiphi ta nkululo se ti lulamisiwile.