VUKORHOKERI BYI TA TSEMIWA EKA VAKOLOTI

Hi Themba Chauke

Masipala wa Giyani wu tivisile hi makungu yo tirhisa pholisi ya xiphemu xa 4 (8) ya 2026/27 ya vulawuri bya swikweleti xikan’we no londza swikweleti hi xikongomelo xo antswisa ku hlengeleta mali ku suka eka vinyi va tinhundzu na tiyindlu lava kolotaka tiakhawunti ta masipala

Masipala wu tivisile vinyi va tiyindlu elokixini ra Giyani leswaku ndzimana ya 4 (8) ya pholisi, leyi pasisiweke hi huvo ya masipala sweswi yi ta tirhisiwa. Pholisi leyi yi vula leswaku vukorhokeri bya masipala a byi fanelanga ku yisiwa eka vinyi va tiyindlu leti kolotaka masipala, ku kondza swikweleti swa vona swi hakeriwa hi ku hetiseka, kumbe ku endla ntwanano wo hakela swikweleti na masipala.

Masipala wu vule leswaku ku antswisa ku hlengeleta mali swi fanerile ku tiyisisa leswaku masipala wu kota ku ya emahlweni wu hlayisa na ku antswisa vukorhokeri bya nkoka eka vaaki.

Kuya hi masipala, swikweleti leswi nga hakeriwangiki swi khumbha masipala hi ndlela yo biha ku hetisisa vutihlamuleri bya wona na ku yisa vukorhokeri hi ku hetiseka.

Loko a vutisiwa hi pholisi leyintshwa, muvulavuleri wa masipala Steve Mavunda, u vule leswaku nawu lowu wu ta khumbha mindyangu leyi kolotaka masipala ku katsa na ku fikelela vukorhokeri byo karhi bya masipala. U vule leswaku leswi swi katsa na ku tleketla malakatsa, kambe a tshikelela leswaku pholisi leyi a yi nge heleli ntsena eka ku tleketla malakatsa, kambe swi ta katsa na byin’wana vukorhokeri bya masipala.

“Pholisi leyi yi ta tirha eka vukorhokeri hinkwabyo bya masipala,” ku vula Mavunda, loko a angula eka swivutiso mayelana na ku langutana na ku tleketla malakatsa ntsena. U vule leswaku pholisi leyi yi ta tlhela yi khumbha vatshami loko va lava byin’wana vukorhokeri bya masipala, ku katsa na loko va lava ku xavisa tinhundzu ta vona kumbe vutiyisisi bya vutshamo.

Mavunda u vule leswaku masipala wu na matsalwa ya tiyindlu leti nga hakeriki tiakhawunti ta masipala, na swona va ta tirhisa vuxokoxoko lebyi loko va landzelerisa pholisi yo londza swikweleti. Ku tirhisiwa ka pholisi leyi swi ta endzhaku ka loko timasipala ta le tikweni ti ri ku hlanganeni na mitlhontlho yo londza swikweleti kusuka eka vatshami na mabindzu lama nga na swikweleti.

Kasi vaaki lava tsakelaka ku hakela swikweleti, va nga ha endzela senthara ya vukorhokeri bya masipala ku ya endla mitwanano na masipala eka hofisi ya nomboro 65. Va nga ha tlhela va tihlanganisa na masipala eka riqingo ra 015 811 5500, ku kuma vuxokoxoko bya mahakelelo ya swikweleti swa vona.

Masipala wu hlohletela vatshami lava nga na swikweleti ku tihlanganisa na masipala leswaku va hakela swikweleti swa vona, leswaku va ta ya emahlweni va kuma vukorhokeri bya masipala, ehandle ka ku khumbheka loko nawu lowu wu tirhisiwa.