N’WA KHAMBANI A NYIKELA

Hi Pilot Manganyi

 Nqambhi ya ndhuma ya vunanga bya Xitsonga leyi tivekaka tanihi ‘N’wa Khambani’ u nyikerile mathawula ya va xisati loko va vona masiku ya tin’hweti eka vana va xikolo hi ku tirhisana na nhlangano lowu xavisaka mathawula lawa wa Lindiwe Sanitary Pads.  Swikolo swo ringana 17 swi vile swi nyikeriwa, laha vana vo hundza 7000 va nga nyikeriwa ku fika sweswi.

Makungu ya pfhumbha leri i ku tiyisisa leswaku vana va xisati va fikelela switirhisiwa leswi loko va ri exikolweni, na hambi loko va ri emakaya ya vona. N’wana un’wana na un’wana u nyikiwile switirhisiwa leswi nga ta n’wi pfuna ku ringana tin’hweti tinharhu, ku va pfumelela ku nghena xikolo na ku tsala swikambelo ku nga ri na ku kanganyiseka loko va ri emikarhini ya vona.

Nhlangano wu boxa leswaku vana vo hlaya a va hlupheka hikokwalaho ka ku tsandzeka ku fikelela switirhisiwa leswi, laha van’wana a va tirhisa magume loko nkarhi wu fikile. Leswi a swi endla leswaku vana va lovha kuya exikolweni hikokwalaho ka ku pfumaleka ka switirhisiwa leswi.

Swikolo leswi nyikeriweke swi katsa, xikolo xa le henhla xa Gawula, Hanyani Thomo, xikolo xa le henhla xa Giyani, xikolo xa le henhla xa Ribungwani, xikolo xa le henhla xa Tiyani, EPP Mhinga, Ximun’wani na swin’wana. Hi nkarhi lowu a a ri exikolweni xa le henhla xa ka Ribungwani, N’wa Khambani u vile a endzeriwa hi xipano xa Munghana Lonene FM xa nongonoko wa 9-12 wa “Swa Risima”.

N’wa Khambani u vile a tiyisisa leswaku, hi Ravuntlhanu, 28, Mhawuri 2026, u ta endzela xikolo xa le henhla xa Jilongo hi ku tirhisana na Meyarankulu wa xifundzantsongo xa Vhembe Nkulukumba Miyelani Chauke, ku nyikela hi mathawula ya va xisati eka vana vo hundza 500. Nhlangano wu tlherile wu tiyisisa leswaku hi Ravuntlhanu i siku ro hetelela laha wu nga ta va wu ri karhi wu nyikela.

“A hi nga yimi ku nyikela hi Ravuntlhanu ntsena, loko lembe ra 2027 ri sungula hi ta nyikela hi yunifomo eka vana va xikolo hi n’hweti ya Sunguti ku fika Nyenyankulu. Hi ta tlhela hi nyikela swo hlamba na swin’wana swa nkoka eka vana va xikolo,” ku boxa N’wa Khambani.