XIPANO XA XAVISIWA

Hi Themba Chauke

Varhandzi va ntlangu wa bolo ya milenge etindhawini ta Giyani va languteriwa ku vona swihlamariso loko nguva yintshwa yi sungula vhiki leri taka, laha xin’wana xa swipano swa le henhla, Makosha Wonder Boys, xi nga le ku xavisiweni. Xipano lexi xi nga le ka mphikizano wa Ligi ya Hollywoodbets, xi le ku xavisiweni hikwalaho ka swiphiqo swa timali leswi tikiselaka xipano ku tirha kahle.

Mutshamaxitulu wa Makosha Wonder Boys Phakisi Chabalala u vule leswaku tihakelo to hlayisa xipano, ngopfungopfu ku tleketla vatlangi kuya eka mitlangu swi tikela xipano ehandle ka nseketelo wa swa timali.

U vule leswaku xipano xi xavisa xiyimo xa xona hi R35 000, hi ntshembho wa leswaku lava nga ta xava xipano va ta kota ku xi yisa emahlweni. Leswi swi humelela hambileswi xipano xi tirheke kahle swinene eka malembe yo hlaya. Hi lembe ra 2024, xipano a xi ri emaninginingini ya ligi ya xifundza, ku ri na ntshembho wa leswaku xi nga ha tlakusiwa kuya ehenhla, Hambiswiritano xipano xi tsandzekile eka mitlangu yo humesana hi ku humesiwa xi nga si ya ekule, leswi endleke leswaku xi pfumala nkateko wo nghena eka Ligi ya ABC Motsepe.

Ehenhla ka leswi, xipano xi vuye xi kota ku hlula eka thonamete ya meyara wa Giyani laha xi nga tibukutela R55 000 hi lembe ra 2025. Hambiswiritano, xipano xi tsandzekile ku wela eka swipano swa 32 eka khapu ya meyara ya 2026, leswi vulaka leswaku i xipano xi ri xoxe lexi hluleke eka mphikizano kambe xi tsandzeka kuya sirhelela xidlodlo eka lembe leri tlhandlamaka. Leswi swi siyile swivutiso swo hlaya hi vumundzuku bya xipano lexi tiphineke hi matlangelo ya kahle eka ntlangu wa bolo ya milenge nkarhi wo leha kambe xi tikeriwa hi swiphiqo swa timali.

Chabalala u vula leswaku ku xavisa xipano ko va xiphiqo xa swa timali, tanihileswi xipano xi nga kotiki kuya emahlweni ehandle ka switirhisiwa leswi lavekaka ku fikelela tihakelo leti lavekaka. Ku xavisiwa ka xipano swi kombisa makumu ya Wonder Boys ehandle ka loko ko kumeka muxavi loyi a nga ta xi yisa emahlweni.