KYD YI KUMA XIDLODLO

Hi Themba Chauke

Xipano xa bolo ya milenge xa KYD xi havaxeriwile xidlodlo eka thonamete ya swipano swa nhungu ya Ndlovu Attorneys endzhaku ka ku hlula xipano xa Shiviti Trouble Makers 2-0, eka tifayinali leti a ti tsakisa swinene erivaleni ra mitlangu ra ka Homu 14B.

Tifayinali leti ti sungurile hi rivilo ra le henhla, laha swipano haswimbirhi a swi hlasela swi lava ku howisa ta ha suka. Eka xiphemu xo sungula swipano haswimbirhi swi tumbuluxile mikateko na kuya emahlweni, kambe swipano hinkwaswo a swi kotanga ku howisa.

Ku boxeketa ku vile kona loko xiphemu xa vumbirhi xa ha ku sungula loko KYD yi kota ku howisa hi nkateko wo sungula, laha va khomeke vatlangi va Shiviti va le ndzhaku va ha etlele ku kuma golo yo sungula. Golo yi pfuxile vaseketeri va le kaya lava beke huwa hi ku tsaka tanihileswi vaseketeri a va sungula ku va na ntshembho eka xipano xa vona leswaku xi nga ha teka xidlodlo xa thonamete.

Hi nkarhi lowu a yi tlanga hi ku tiyimisela, KYD yi yile emahlweni yi yisa ntshikelelo eka Shiviti Trouble Makers, va tlanga hi matimba swinene. Xipano xa le kaya a xi fambisa bolo hi ndlela ya kahle, va ringetela vatlangi va le ndzhaku va vaendzi tanihileswi a va lava ku engetela xikoro. Ku tiyimisela ka vona swi tswarile mihandzu loko KYD yi kuma xikoro xa vumbirhi ku endla 2-0.

Golo ya vumbirhi yi vekile KYD eka xiyimo xo lawula ntlangu leswi siyeke Shiviti va ri na ntirho wo tika ku kuma tigolo timbirhi leswaku va vuya eka ntlangu. Leswi swi vonakarile eka timinete to hetelela ta 15 kuya eka 10 laha a va kombisa swikoweto swo antswa hi nkarhi lowu a va ringeta ku kuma xikoro xo hunguta vangwa. Hambiswiritano, vatlangi va le ndzhaku va KYD a va lulamerile swinene laha a va sirhelela xikoro xa vona ku kondza ntlangu wu fika emakumu.

Ku hlula ka KYD eka khapu ya Ndlovu Attorneys, va tibukutele R14 000, xikan’we na jesi ya ntlangu wa bolo ya milenge na swin’wana switirhisiwa swa mitlangu. Shiviti Trouble Makers, lava hluriweke eka tifayinali va kumile R4 000 na jesi ya ntlangu wa bolo ya milenge.

Thonamete leyi yi tlhele yi xixima vatlangi lava tirheke kahle, laha mutlangi wa Shiviti Trouble Makers Promise Ndlovu, loyi a tivekaka hi vito ra ‘Gora’ a kumeke sagwati ra mutlangi wa thonamete. Ndlovu u vule leswaku wa khensa swinene ku va a tekeriwile enhlokweni ku kuma xidlodlo lexi hambileswi xipano xakwe xi hluriweke eka tifayinali. “A ndzi endla leswi a swi fanerile ku tiyisisa leswaku xipano xa hlula, kambe khombo ra kona, a hi hlulanga. Ndza tsaka ku va ndzi kumile sagwati leri hambileswi hi hlulekeke eka thonamete,” ku vula yena.

Thonamete leyi ya lembe na lembe yi hlanganisa swipano swo hambana-hambana swa le Giyani ku phikizanela xidlodlo na masagwati ya vatlangi. Kasi loko khapu yi ri eka xipano xa le kaya, matihlo ya le ku languteni leswaku KYD yi nga ha sirhelela xidlodlo lexi lembe leri taka.